Volleyball: APR na Police mu makipe yemeje kuzitabira “MEDWELL Pre – Season Tournament”

Amakipe y'Ingabo na Polisi by'u Rwanda, ari muyemeje kuzitabira “MEDWELL Pre – Season Tournament”, Irushanwa ryateguwe n'umuryango IMEGH [Initiative for Medical Equity and Global Health] na Supra Event ku bufatanye n'Ishyirahamwe ry'umukino wa Volleyball mu Rwanda [FRVB], hagamijwe gufasha amakipe kwinjira neza mu Mwaka mushya w'imikino [2025-26].

Iri rushanwa riteganyijwe ku wa Gatanu w'iki Cyumweru ndetse no ku wa Gatandatu, rikazakinirwa muri Petit Stade Amahoro i Remera, mu Mujyi wa Kigali.

Aya makipe y'inzego zishinzwe Umutekano w'Igihugu, arimo: APR VC na APR WVC ndetse na Police VC na Police WVC.

Uretse amakipe asanzwe akina Shampiyona y'ikiciro cya mbere, “MEDWELL Pre – Season Tournament” izitabirwa n'amakipe 4 y'Ibigo by'Ubuzima ndetse hakazanakinwa n'umukino uzahuza abakanyujijeho mu Ikipe y'Igihugu, mu bihe bitandukanye.

Amakuru THEUPDATE ifite, n'uko bamwe mu bakinnyi bakanyujijeho bazakina iri Rushanwa ku ruhande rw'abakiniye Ikipe y'Igihugu, barimo: Nsabimana Eric uzwi nka Machine, Yakan Laurence Guma n'abandi...

Biteganyijwe ko aba bakanyujijeho mu Ikipe y'Igihugu, bazakina umukino uzabahuza n'Ikipe ya Kinyinya, nayo igizwe n'abafite amazina muri Volleyball y'u Rwanda.

APR VC, APR WVC, Police VC na Police WVC ziyongereyeho andi makipe arimo: Kepler Volleyball Club, Gisagara Volleyball Club, REG Volleyball Club, Kigali Volleyball Club [KVC], East African University of Rwanda [EAUR] mu Bagore n'Abagabo na Rwanda Revenue Authority [RRA VC].

THEUPDATE yamenye amakuru y'uko kwiyandikisha ku makipe yifuza kuzakina iri Rushanwa rigiye gukinwa ku nshuro ya mbere, bizarangira kuri uyu wa Gatatu tariki ya 08 Ukwakira [10] 2025.

Buri Kipe muzifuza kwitabira iri Rushanwa, isabwa Amafaranga Ibihumbi 100 yo kwiyandikisha.

Mu gihe, Ikipe izegukana Igikombe, gishobora guherekezwa n'Amafaranga akabaka Miliyoni y'u Rwanda.

Uretse Imikino, biteganyijwe ko muri iri Rushanwa hazabamo ibindi bikorwa birimo: Nk'urugendo rwo gukangurira abantu gukora Siporo, igikorwa cyo gutanga Amaraso ndetse n'ibihembo ku Bantu n'Ibigo baharanira iterambere ry'imibereho myiza y'abakozi mu nzego z'Ubuvuzi.

Alphonse Nsengiyumva, Umuyobozi wa Supra Event iri gutegura iri Rushanwa, mu Kiganiro kihariye yahaye THEUPDATE, yagize ati:“Twateguye iri Rushanwa tugamije gufasha amakipe kwitegura neza Umwaka mushya wa Shampiyona, iteganyijwe gutangira tariki ya 17 Ukwakira [10] 2025. Ntabwo MEDWELL Pre – Season Tournament ari Irushanwa rije gusuhuza gusa ngo rigende, ahubwo turahari no mu yindi Myaka”.

Amafoto

Alphonse Nsengiyumva yasabye Abafana kuzaza ku bwinshi, cyane ko amakipe azaba yabucyereye.