Umudiporomate wa DR – Congo yafatiwe mu Modoka itwaye Ibiro 205 bya Cocaine

THEUPDATE

Jul 21, 2025 - 11:24

Umudiporomate wa DR – Congo yafatiwe mu Modoka itwaye Ibiro 205 bya Cocaine

Umudipolomate wa Repubulika ya Demokarasi ya Congo ukorera mu Bubiligi n'abandi bantu babiri, bafungiye muri Bulgaria nyuma yo gufatirwa ku mupaka ari mu modoka itwaye Ibiro bigera kuri 205 by'Ikiyobyabwenge cya Cocaine, nk'uko Minisiteri y'ubutegetsi y'iki gihugu ibivuga.

Iyi modoka yafashwe, yari ivuye mu Bubiligi yerekeza muri Turkiya iciye muri Bulgaria, ifite nimero ziyiranga [Plate Number/Plaque) zo mu Bubligi.

Yari irimo abagabo babiri b'imyaka 40 na 43 n'umugore w'imyaka 54, nk'uko abategetsi babivuga.

Ambasade ya Repubulika ya Demokarasi ya Congo mu Bubiligi cyangwa Minisiteri y'ububanyi n'amahanga ya Repubulika ya Demokarasi ya Congo, ntacyo baravuga kuri ibi bivugwa ku Mudipolomate w'iki gihugu ufungiye muri Bulgaria, nk'uko amakuru dukesha Ikinyamakuru mpuzamahanga cy'Abongereza BBC abivuga.

Ifatwa ry'aba bantu n'ibyo biyobyabwenge ryatangarijwe abanyamakuru ku mupaka, ahari kandi abaminisitiri babiri muri leta ya Bulgaria, abakuru ba polisi n'abashinzwe abinjira n'abasohoka.

Minisiteri y'ubutegetsi bw'igihugu ya Bulgaria ivuga ko iyi ari yo cocaine nyinshi cyane ifatiwe icya rimwe ku mipaka y'iki gihugu.

Abategetsi bavuze ko iyo modoka yo mu bwoko bwa Land Rover ifite nimero ziyiranga z'abadipolomate bakorera mu Bubiligi yari itwawe n'umugabo w'imyaka 43 wo muri Bulgaria, irimo umudipolomate wo muri DR Congo w'imyaka 40, n'Umubiligikazi w'imyaka 54 ukomoka muri DR Congo, yafatihwe ku wa gatanu ku mupaka wa Kapitan Andreevo muri Bulgaria irimo kwerekeza muri Turkiya,.

Minisiteri y'ubutegetsi ya Bulgaria ivuga ko imbwa yatojwe kwinukiriza no gutahura ibiyobyabwenge yitwa Raya yerekejwe ku mavarisi yari inyuma y'umushoferi maze ikerekana amakenga.

Ayo mavarisi yajyanywe gucishwa mu kindi cyuma gipima maze nyuma yo kuyafungura basanga arimo amapaki 179 arimo iriya fu yera y'ikiyobyabwenge cya cocaine.

Cocaine yari irimo yari ipakiye mu mavarisi atanu, nk'uko abategetsi muri Bulgaria babivuga.

Abari muri iyi modoka bahise bafungwa mu gihe hakiri gukorwa iperereza.

Aba bafunze by'agateganyo bashobora guhanishwa igifungo kiri hagati y'imyaka 15 na 20 n'ihazabu mu gihe bahamwa n'ibyaha baregwa bijyanye no gutwara ibiyobyabwenge, nk'uko ikigo cy'itangazamakuru cya Bulgaria kibivuga.

Minisiteri y'Ubutegetsi bw'Igihugu ya Bulgaria, ivuga ko hashingiwe ku isesengura ryakozwe n'urukiko, iyi Cocaine yafashwe ifite agaciro ka Miliyoni zirenga 22 z'Amadorari ya Amerika.