Sina Gerard na Police bongeye kwegukana Shampiyona y’Igihugu y’Imikino ngororamubiri

Ikipe ya Sina Gerard AC na Police AC zegukanye umunsi wa kabiri wa Shampiyona y'Igihugu y'imikino ngororamubiri izwi nka 'National Track and Field Championship', nk'uko zari zabikoze mu Kwezi kwa Gashyantare [2] 2025, ubwo hakinwaga umunsi wa mbere.

Uyu munsi wakiniwe kuri Sitade Amahoro, ku wa Gatandatu tariki ya 19 Nyakanga [7] 2025.

Witabiriwe n'abakinnyi barenga 700, bavuye mu makipe 13 atandukanye y'imbere mu gihugu.

Ku ruhande rw'Ikipe ya Sina Gerard, Florence Niyonkuru n'umwe mu bakinnyi bayifashije kwitwara neza, nyuma yo kwegukana umwanya wa mbere mu Ntera ya Metero Ibihumbi 10.

Niyonkuru yongeye kwerekana abakunzi b'Imikino ngororamubiri imbere mu gihugu ko ari umukinnyi ukomeye, cyane mu Kwezi gushize, ari umwe mu Banyarwanda bitwaye neza muri Marathon mpuzamahanga ya Kigali, yitiriwe Amahoro.

Muri izi Metero Ibihumbi 10, yazegukanye akoresheje iminota 32, amasegonda 23 n'iby'ijana 29. Yakurikiwe na Angelique Abishatse w'Ikipe ya APR AC.

Muri izi Metero kandi, Ikipe ya Sina Gerard yakomeje kwiganza, kuko n'umwanya wa gatatu wegukanywe na Regine Ntawungurizimana, ukinira iyi Kipe yo mu Karere ka Rulindo mu Ntara y'Amajyaruguru.

Mu kiciro cy'abagabo, izi Metero zegukanywe na Jean Claude Nsabimana ukinira Ikipe ya APR AC, akoresheje iminota 30, amasegonda 9 n'iby'ijana 57.

Yakurikiwe na Emmanuel Nshimiyimana basanzwe bakinana, amurushije amasegonda 50.

Umwanya wa gatatu, wegukanywe na Claude Twizeyimana w'Ikipe ya Nyaruguru AC, wasizwe na Nshimiyimana amasegonda 15.

Kwitwara neza muri iyi shampiyona, byafashije Niyonkuru na Nsabimana, kwiyongerera amahirwe yo kuzahagararira Igihugu muri Shampiyona y'Isi y'Imikino ngororamubiri iteganyijwe i Tokyo mu Buyapani, mu Kwezi kwa Nzeri [9] 2025.

Mu gihe Ikipe ya Sina Gerard yishimiraga kwitwara neza, Ikipe ya Police AC nayo ntabwo yari kure, kuko yegukanye Igikombe cy'abakinnyi b'abagabo bahize abandi, ibifashijwemo n'abakinnyi nka Jeanne Gentille Uwizeyimana, Christopher Tuyisimire na Serge Nzayisenga.

Muri rusange, mu kiciro cy'abagore, Ikipe ya Sina Gerard AC yabaye iya mbere, ikurikirwa n'Ikipe ya APR AC, mu gihe umwanya wa gatatu wegukanywe na Police AC.

Mu kiciro cy'abagabo, Umwanya wa mbere wegukanywe n'Ikipe ya Police AC, ikurikirwa na APR AC mu gihe umwanya wa gatatu wegukanywe na Sina Gerard AC.

Amafoto