Sebikwekwe Cyprien yahawe 'kuyobora Kirehe VC' nyuma yo kugaruka muri Shampiyona
Nyuma yo kudakina Umwaka ushize wa Shampiyona y'ikiciro cya mbere cya Volleyball mu Rwanda, Ikipe y'Akarere ka Kirehe, Kirehe Volleyball Club, yagarutse.
Iyi kipe ikundwa n'abatari bacye mu batuye aka Karere by'umwihariko abo mu Mujyi wa Nyakarambi no mu nkengero, izakina Shampiyona y'i 2025-26, iteganyijwe mu Kwezi k'Ukwakira [10] uyu Mwaka.
Mbere gato y'uko Shampiyona y'i 2024-25 itangira, Kirehe VC yikuye mu makipe azayikina, ku mpamvu zatangajwe ko zari zishingiye ku mikoro.
Mu gihe habura Amezi atagera kuri abiri ngo Shampiyona itangire, Kirehe VC yasabye kongerwa gushyirwa mu makipe azayikina, nk'uko byemejwe na Gertrude Kubwimana, Umuyobozi ushinzwe ibijyanye na Tekinike mu Ishyirahamwe ry'umukino wa Volleyball mu Rwanda, FRVB.
Mu kiganiro yagiranye n'Ikinyamakuru The Newtimes, Umuyobozi mushya w'iyi kipe, Cyprien Sebikwekwe, yatangaje ko hari ibikiri ku nozwa mbere y'uko Shampiyona itangira, kandi bizeye ko Ikipe izagaruka ikomeye kurushaho.
Yagize ati:“Nta byinshi navuga kuri ubu, cyane ko njye n'abo tuzakorana, tugitegreje ihererekanyabubasha, na komite icyuye igihe. Gusa, ndizeza abaturage b'Akarere ka Kirehe n'abakunzi ba Kirehe VC muri rusange, ko tuzakora ibishoboka byose, Ikipe ikagaruka mu bihe byiza yahoranye”.
Kugeza ubu, bitandukanye n'aho yari isanzwe ikinira, mu Mujyi rwagati wa Nyakarambi, hari kubakwa Gymnasium iyi kipe izajya ikiniraho, bivugwa ko yatwaye Miliyari 2 na Miliyoni 700 z'Amafaranga y'u Rwanda.
Mu Cyumweru gishize ubwo Umunyamakuru wa THEUPDATE yageraga muri uyu Mujyi n'ubwo atemerewe gufata amafoto, yasanze imirimo igeze hafi ku kigero cya 85-90 ku Ijana.
Ntagihindutse, biteganyijwe ko inteko rusange y'Ishyirahamwe ry'umukino wa Volleyball mu Rwanda, iteganyijwe kuri uyu wa 16 Kanama [8] 2025, izemeza ubusabe bwa Kirehe VC bwo kongera kugaruka mu makipe akina Shampiyona y'ikiciro cya mbere.
Mu gihe imyiteguro yo kugaruka muri Shampiyona irimbanyije, biravugwa ko Kirehe VC iri mu biganiro n'abatoza barimo: Fidele Nyirimana wayitoje mu Mwaka w'i 2017-18 na Serugo Christophe, utoza Ikipe ya Rusumo High School.
Atoza Ikipe ya Kirehe VC, Fidele Nyirimana, yayihesheje umwanya wa kabiri muri Shampiyona.
Nyuma yo gushingirwa mu Mujyi wa Kigali mu 2010 n'abaturage bavuka i Kirehe, iyi kipe ibarizwa mu Karere ka Kirehe kuri ubu.
Mu Mwaka w'imikino w'i 2017-18, Kirehe VC yegukanye Irushanwa ry'Igikombe cya Carré d’As trophy, gusa kuri ubu, iri rushanwa ntabwo rigikinwa.
Ku mukino wa nyuma, Kirehe VC yasasiye Ikipe ya APR VC iyitsinze amaseti 3-1.
Muri uwo Mwaka, iyi kandi yatwaye Igikombe cy'Irushanwa ryo kwibuka Padiri Kayumba Emmanuel, wari umuyobozi w'Ishuri rya GSOB kuva mu 1995, kugeza mu 2009 yitabye Imana.
Iyi kipe kandi yatojwe n'abatoza batandukanye, barimo: Ntawangundi Dominique, Jean de Dieu Bagirishya, Peter Kamasa, Hakizimana Onesme, Kwizera Pierre Marchal na Mbonyuwontuma Jea Luc 'Kizungu'.
Inzira y'ibibazo byayikururiye kuva mu makipe yakinaga Shampiyona y'ikiciro cya mbere, yatangiye mu 2020, ubwo iyi kipe yamaraga Amezi 8 idahembye abakinnyi.
Ibi bibazo byaje gukaza umurego mu gihe cy'Icyorezo cya Covid-19, biza guhumira ku mirari mu 2023-24, ubwo yikuraga muri Shampiyona byeruye.
Amafoto
What's Your Reaction?
Like
1
Dislike
0
Love
0
Funny
0
Angry
0
Sad
0
Wow
1
