Ni hagati ya 3,000 na 2,000,000: Rayon Sports yatangaje ibiciro by'Umunsi w'Igikundiro

Ikipe ya Rayon Sports, yatangaje icyo bisaba ku muntu wifuza kuzaba ari muri Sitade Amahoro i Remera mu Mujyi wa Kigali, mu birori ngarukamwaka bitangiza umwaka w'imikino muri iyi kipe yambara Ubururu n'Umweru, bizwi nk'Umunsi w'Igikundiro, cyangwa Rayon Sports Day mu ndimi z'amahanga.

Ibi birori by'imbaturamugabo, biteganyijwe tariki ya 15 Kanama [8] 2025, bikaba ari no ku nshuro ya mbere bigiye gukorerwa muri Sitade Amahoro ivuguruye.

Ibi birori byahujwe n'umukino wa gicuti uzahuza iyi kipe bivugwa ko ikunzwe n'Abanyarwanda batari bacye na Yanga Sports Club yo mu gihugu cya Tanzaniya, nayo bivugwa ko ikundwa n'abaturage benshi muri Tanzaniya.

Kwinjira muri ibi birori by'impurirane, ntabwo ari ubuntu, ahubwo hashyizweho ibiciro mu rwego rwo gufasha abafana gutangira kwisuganya hakiri kare.

Itike ya macye yo kwinjira muri Sitade Amahoro kuri uyu munsi, yashyizwe ku mafaranga 3000 Frw, mu gihe hari n'izaba igurwa 2,000,000 z'Amafaranga y'u Rwanda.

Uko ibiciro bihagaze:

• Sky Box: 2,000,000
• Executive Seat: 150,000
• VVIP: 100,000
• VIP:30,000
• Classic Seat: 15,000
• Lower Bowl: 5,000
• Upper Bowl: 3,000.

Umunsi w’Igikundiro [Rayon Sports Day], watangiye mu 2019. Guhera icyo gihe, ukorwa buri mwaka.

Mu 2023 wakozwe ku nshuro ya gatatu yikurikiranya, no ku nshuro ya kane muri rusange kuva mu 2019.

Mu mwaka ushize w'i 2024, uyu munsi wakozwe tariki ya 03 Kanama [8], ubera kuri Kigali Pelé Stadium, mu gihe byari biteganyijwe ko wari kubera kuri Sitade Amahoro, bikaza guhinduka ku munota wa nyuma.

Uyu munsi uhuzwa no kumurikira abafana Umwambaro iyi Kipe izakoresha mu mwaka w'imikino, abakinnyi n'abatoza bashya iyo bahari ndetse n'abaterankunga bazakorana.