Patriots yasinyishije ‘Raphiael Putney’ wakiniye Miami Heat mbere ya Play-offs

Ikipe ya Patriots Basketball Club, yatangaje ko yasinyije Raphiael Putney mbere yo gukina imikino ya kamarampaka [Play-offs]

Uyu mukinnyi w'Umunyamerika, yakiniye Ikipe ya Rivers Hoopers yo muri Nijeriya mu mikino ya nyuma ya Basketball Africa League [BAL], yakiniwe i Pretoria muri Afurika y'Epfo, mu ntangiriro z'uku Kwezi.

Imikino ya kamarampaka, iteganyijwe gutangira tariki ya 20 Kamena [6] 2025.

Putney w'Imyaka 35 y'amavuko, n'umwe mu bakinnyi b'Abafowaridi [Forward] bitezweho kuzafasha Patriots BBC, cyane ko indeshyo ya Metero 2 na Santimetero 8 afite ari inkingi ya mwamba.

Biteganyijwe ko agera i Kigali kuri uyu wa Gatatu tariki ya 18 Kamena [6] 2025, iminsi ibiri [2] mbere y'imikino nyirizina.

Mbere yo kwerekeza muri Patriots BBC, Putney yanyuze mu makipe arimo: Cape Town Tigers yo muri Afurika y'Epfo, Miami Heat, UMass Minutemen na Rio Grande Valley Vipers zo muri Leta zunze Ubumwe z'Amerika, Al-Ittihad Jeddah yo muri Arabiya Sawudite [Saudi Arabia] n'izindi..