Gatsinzi Venuste yasinye Amasezerano y'Imyaka 3 muri Gisagara VC

Gatsinzi Venuste yasinye Amasezerano y'Imyaka itatu mu Ikipe y'Akarere ka Gisagara, Gisagara VC.

Ni mu gihe iyi kipe irimbanyije urugamba rwo kwitegura Umwaka mushya wa Shampiyona, uteganyijwe tariki ya 17 Ukwakira [10] 2025.

Mu Mwaka ushize w'imikino, Gatsinzi yari yasinyiye iyi Kipe, ariko amasezerano aza kugirwa impfabusa, nyuma y'uko yari agifite amasezerano muri APR VC.

Nyuma yo kugaruka muri APR VC, yagowe cyane n'imvune yo mu Ivi yakuye mu mikino ny'Afurika ya Volleyball ikinirwa ku Mucanga, yakiniwe muri Maroke.

Aha muri Maroke, Gatsinzi Venuste, yari mu Ikipe y'Igihugu y'u Rwanda, afatanyije na Olivier Ntagengwa.

Iyi mikino yari iyo gushaka itike y'Imikino Olempike yo mu Mpeshyi, yabereye mu Bufaransa mu 2024.

Gatsinzi yerekeje muri Gisagara VC nyuma yo kumara Imyaka hafi 7 muri APR VC.

Akigera muri APR VC, yayifashije kwegukana Igikombe cya Shampiyona y'i 2020, Ikipe yari abereye Kapiteni itozwa na Mutabazi Elie, kuri ubu utoza RRA VC.

Isinya rye muri Gisagara VC, rije rikurikira irya; Sylvester Ndayisaba na Ronald Muvara bavuye mu Ikipe ya REG VC.

Tariki ya 08 Kanama [8] 2025, Ikipe ya Gisagara VC yatangiye imyitozo, iyobowe n'Umutoza, Yakan Laurence Guma.

Gatsinzi Venuste yasinyije Gisagara VC nyuma yo kumara Imyaka 7 muri APR VC, yinjiyemo asoje Amashuri yisumbuye mu 2018.