APR FC yashyizwe mu makipe 12 azitabira CECAFA Kagame Cup 2025

Ikipe y'Ingabo z'u Rwanda, APR FC, yatangajwe mu makipe 12 azakina imikino ya CECAFA Kagame Cup yo muri uyu Mwaka w'i 2025.

Byatangajwe mu itangazo ryashyizwe hanze n'ubuyobozi bwa CECAFA kuri uyu wa kabiri tariki ya 05 Kanama [8] 2025.

N'ubwo ntacyo APR FC irabivugaho, ariko ni inshuro nke ititabiriye iri rushanwa riterwa inkunga na Perezida Kagame.

Muri iri tangazo, Auka Gecheo, umuyobozi ushinzwe ibikorwa mu Impuzamashyirahamwe y'Umupira w'Amaguru muri Afurika y'Iburasirazuba no Hagati [CECAFA], yavuze ko imikino y'iri rushanwa iteganyijwe hagati ya tariki 2-15 Nzeri [9] 2025, ikazakinirwa i Dar es Salaam muri Tanzania.

Gecheo yavuze ko buri gihugu kigize CECAFA kizahagararirwa n'Ikipe imwe, uretse Tanzaniya izahagararirwa n'amakipe abiri, nk'Igihugu kizakira iyi mikino.

Uretse amakipe yo muri CECAFA, Auka Gecheo, yavuze ko batumiye n'andi makipe yo mu bindi byerekezo [Zone].

Yakomeje agira ati:“Twiteze ko CECAFA y'uyu Mwaka izaba irimo ihanga ryo ku rwego rwo hujuru, cyane ko amakipe menshi azayikoresha mu rwego rwo kwitegura amarushanwa ya CAF ateganyijwe mu Mwaka w'imikino w'i 2025-26”.

Amakipe azitabira CECAFA agizwe na: Vipers SC (Uganda), El Merriekh SC Bentiu (South Sudan), Mlandege SC (Zanzibar), Al Hilal (Sudan), Kenya Police FC (Kenya), Ethiopia Insurance (Ethiopia), MCC FC (Somalia), APR FC (Rwanda), Aigle Noir FC (Burundi), Young Africans SC, Simba SC (Tanzania) na ASAS Djibouti Telecom (Djibouti).

Umwaka ushize, iri rushanwa ryegukanywe n'Ikipe ya Red Arrows yo mu gihugu cya Zambiya, itsinze APR FC yo mu Rwanda, mu mukino wa nyuma wakiniwe kuri KMC Stadium.

APR FC imaze kwegukana iri rushanwa inshuro eshatu [2004, 2007 na 2010].

Mu Mwaka w'i 1996 n'uw'i 2000, yatsindiwe ku mukino wa nyuma.

Mu 1996 yatsinzwe na Simba SC yo muri Tanzaniya, mu gihe mu 2000 yatsinzwe na Tusker FC yo muri Kenya.

CECAFA Kagame Cup y'Umwaka ushize, yakinwe hagati ya tariki ya 09 n'iya 21 Nyakanga [7] 2024.

CECAFA Kagame Cup, iterwa inkunga na Perezida Kagame Paul w'u Rwanda, aho buri Mwaka atanga Ibihumbi 60 by'Amadorali ya Leta zunze Ubumwe z'Amerika.

Ikipe itwaye Igikombe ihabwa Ibihumbi 30$, iya kabiri igahabwa Ibihumbi 20$, mu gihe iya gatatu itwara Ibihumbi 10$.