Ngororero: 15 bakomerekeye mu mpanuka y'Imodoka yahitanye 3

Impanuka y'Imodoka ya Tagisi yo mu Bwoko bwa Hiyase (Hiace), yahitanye ubuzima bw'abantu 3 mu gihe 15 bayikomerekeyemo bikabije.

Iyi mpanuka yabereye mu Karere ka Ngororero ho mu Ntara y'i Burengerazuba, ku gicamunsi cya tariki ya 26 Ukwakira (10) 2025. 

Amakuru y'iyi mpanuka, yahamijwe n'Umuyobozi w'Akarere ka Ngororero, Nkusi Christophe.

Meya Nkusi yavuze ko, abapfiriye muri iyi mpamuka, ari Umugore 1 n'Abagabo 2.

Yavuze ko iyi Hiyase yari ivuye mu Karere ka Musanze yerekeza mu Murenge wa Muhororo ho muri Ngororero, aho abari bayirimo bari bagiye mu muhango wo Gusaba Irembo.

Akomoza ku cyayiteye, yavuze ko Imodoka yageze mu Ikorosi riri mu Murenge wa Kabaya, Akagari ka Gaseke, ikananirwa kurikata igahita igwa munsi y’Umuhanda.

Ati:“Iyi mpanuka ikimara kuba, Abagabo 2 bahise bitaba Imana, Umugore yapfuye ari mu nzira ajyanywe mu Bitaro bya CHUK”.

Abapfiriye muri iyi mpanuka, ni “Dusabimana Françoise w’Imyaka 47 y’amavuko, Kiriberi Jean Baptiste w’Imyaka 55 na Hagumimana Emmanuel nawe warufite imyaka 55 y’amavuko”.

Batandatu bayikomerekeyemo, bajyanywe kuvurirwa mu Bitaro bya Kabaya,  9 bajyanywe mu Bitaro bya Ruhengeri.

Mu izina ry'abaturage b'Akarere ka Ngororero, Meya Nkusi yihanganishije ababuriye ababo muri iyi mpanuka ndetse n’abayikomerekeyemo.