Mukanemeye umufana ukomeye wa 'Mukura na Amavubi' yatabarutse

Mukanemeye Madeleine wari uzwi nk'Umufana w'akadasohoka w'Ikipe ya Mukura VS&L n'Ikipe y'Igihugu y'u Rwanda, Amavubi, yitabye Imana.

Inkuru y'Urupfu rwa Mukanemeye, yagiye hanze kuri iki Cyumweru, tariki ya 03 Kanama 2025.

Uyu mukecuru wari umaze kwigarurira imitima y'abakunzi na ruhago, yazize rutunguranye. Gusa, ku myaka hafi 103, bishobora kuba iza bukuru.

Bimwe mu bashenguwe n'uru rupfu, barimo Ikipe ya Mukura VS&L, yari yarirunduriyemo.

Mu itangazo yashyize hanze ivuga kuri uru rupfu, Mukura VS&L yagize iti:“Ubuyobozi bw'Ikipe ya Mukura VS&L, bubabajwe no kumenyesha abakunzi b’umupira w’amaguru, ko Mukanemeye Madeleine uzwi nka Mama Mukura, yitabye Imana azize urupfu rutunguranye”. 

Rikomeza rigira riti:“Gahunda zo kumushyingura, muzazimenyeshwa”.

Risoza rigira riti:“Imana imwakire mu bayo”.

Mukanemeye wabarirwaga mu Myaka 103, yari atuye mu Karere ka Huye mu Murenge wa Rango, mu Ntara y'Amajyepfo. Yataniye gufana Mukura VS&L mu myaka ya za 1980.

Mu bihe bitandukanye, yakunze gushyigikira Amavubi, by'umwihariko mu mikino yakiniwe kuri Sitade ya Huye.

Amafoto