Madagascar: Imyigaragambyo y'aba “Gen – Z” yahiritse Ubutegetsi bwa Andry Rajoelina

THEUPDATE

Oct 15, 2025 - 09:29

Madagascar: Imyigaragambyo y'aba “Gen – Z” yahiritse Ubutegetsi bwa Andry Rajoelina

Abasirikare n'abajandarume ni bo baraye mu ngoro y'umukuru w'igihugu izwi nka 'Palais d'État d'Ambohitsorohitra' i Antananarivo.

Mu myaka igera kuri 15 ishize, iyi yari ingoro ya Perezida c waraye akuwe ku butegetsi nyuma y'imyigaragambyo imaze ibyumweru y'urubyiruko ruzwi nka 'Generation Z'.

“Tugiye gufata ibintu mu maboko” – ni amagambo Colonel Michael Randrianirina yavuze ejo ku mugoroba imbere y'urubyiruko ibihumbi rwariho rwigaragambya ku rubuga rwa “Place du 13 Mai” mbere y'uko we n'itsinda ry'abasirikare bo mu mutwe ayobora wa CAPSAT n'abandi bo mu yindi mitwe y'ingabo imushyigikiye berekeza kuri ya ngoro y'umukuru w'igihugu.

Ibi byakurikiwe n'ibikorwa by'urubyiruko byo kugaragaza ibyishimo bikomeye mu mihanda y'umurwa mukuru bishimira ko babashije gukuraho Perezida Rajoelina ubu uri mu buhungiro ahantu hatazwi neza.

Ibinyamakuru muri Madagascar byatangaje ko kuri uyu wa gatatu ibikorwa bitandukanye by'ubuzima busanzwe mu mujyi wa Antananarivo n'ahandi mu gihugu byasubukuye, ko imyigaragambyo yarangiye.

Byageze aha gute?

Uko aba Gen-Z basunitse Perezida Rajoelina, kugeza ahunze

Imyigaragambyo y'urubyiruko rw'aba Gen-Z muri Madagascar yatangiye binubira ibura ry'amashanyarazi n'ubukene bw'amazi meza, abasesenguzi bavuga ko ku ikubitiro Perezida Rajoelina atahaye agaciro kaninini uru rubyiruko.

Imbuga nkoranyambaga zafashije kwihutisha akababaro k'urubyiruko mu gihugu, ndetse no guhanahana amakuru y'uburyo n'aho bari bukorere imyigaragambyo, byafashe indi ntera birenga umurwa mukuru uzwi cyane nka “Tana” bigera no mu yindi mijyi y'iki kirwa cya kane kinini ku isi nka Toamasina, Antsirabe, na Mahajanga.

Hejuru y'amazi n'amashanyarazi urubyiruko rwazamuye ijwi no ku bindi bibazo birimo ruswa, serivisi mbi za Leta, gucunga nabi umutungo wa Leta…maze rutangira gusaba ubutegetsi kuvaho.

Igisirikare cyari gicecetse, mu gihe Igipolisi na Jandarumori bahanganye n'abigaragambya.

Perezida Rajoelina yagerageje guturisha abigaragambya akuraho guverinoma yose atangira gushyiraho abandi ariko aho byari bigeze aho uru rubyiruko ruvugaga ko icyo rushaka ari uko we ubwe yegura akava ku butegetsi bw'iki kirwa gituwe n'abaturage miliyoni zigera kuri 30.

Ibintu byagiye kumera nabi cyane mu mpera z'icyumweru gishize ubwo umutwe w'ingabo uzwi nka CAPSAT [Corps d'Armée des Personnels et des Services Administratifs et Techniques] wakozanyagaho n'abajandarume n'abapolisi urengera abigaragambya.

Uyu mutwe w'ingabo ukuriwe na Colonel Michael Randrianirina wasabye indi mitwe y'ingabo gusubira mu bigo bya gisirikare, n'abakuru bayo babishaka ngo baze biyunge kuri CAPSAT.

Bamwe bavuga ko ari bwo Perezida Rajoelina yabonye ko bikomeye akava mu ngoro ye na kajugujugu akerekeza ku kirwa gituranyi - igihugu cya Réunion - aho yavanywe n'indege ya gisirikare y'Ubufaransa yamujyanye ahantu hatazwi neza kugeza ubu.

Ku wa mbere nijoro ari aho yahungiye, Rajoelina yavuze ko yihishe “ahantu hatekanye” nyuma y'igerageza ryo kumwica, yamagana abashaka gukora “Coup d'état” mu gihugu no gushaka kugisenya.

Igihe cy'ingenzi cyazanywe na CAPSAT

Hari ku wa gatandatu ushize, nyuma y'ibyumweru by'imyigaragambyo urubyiruko rwari rutegereje kandi rwizeye ko abasirikare bashobora kuza ku ruhande rwabo, nk'uko umwe mu bari bakuriye abigaragambya yabitangarije umunyamakuru w'Ikinyamakuru cy'Abongereza BBC dukesha iyi nkuru, wari i Antananarivo.

Kuri uwo munsi, Col Michael Randrianirina n'abasirikare be baherekeje abigaragambya kuri rwa rubuga “Place du 13 Mai” babuzwaga cyane kugeramo, maze barushaho kuzamura amajwi basaba Rajoelina kwegura.

Kugira ngo bagere kuri urwo rubuga CAPSAT yarasanyeho n'abajandarume bari ku ruhande rwa Rajoelina.

Col Randrianirina avuga ko umusirikare umwe wa CAPSAT yahasize ubuzima.

Kuva kuri uwo munsi indi mitwe y'ingabo na yo yatangiye kwifatanya na CAPSAT hamwe n'abigaragambya.

CAPSAT ni umutwe w'ingabo wivumbagatanyije kuri leta mu 2009 uhirika ubutegetsi bwa Marc Ravalomanana ndetse arahunga, maze ushyiraho Rajoelina nka Perezida w'inzibacyuho.

Ubumwe bw'abari ku butegetsi n'abatavugarumwe na bwo

Ku wa kabiri, Perezida Rajoelina yasohoye iteka risesa inteko ishingamategeko nyuma yo kumenya ko yari igiye guterana ikamukuraho ikizere, igatangaza ko nta butegetsi buriho kugira ngo Inama Nkuru y'ubucamanza ishyireho ubutegetsi bushya.

Inteko yirengagije iryo teka rya perezida uri mu buhungiro, iraterana, ku badepite bagera ku 130, biganjemo abo mu ishyaka rya Rajoelina, bunze ubumwe n'abo ku ruhande rutavugarumwe n'ubutegetsi maze ku bwiganze busesuye batora bemera gukuraho Rajoelina.

Inama nkuru y'ubucamanza yahise isaba Col Michael Randrianirina komanda mukuru wa CAPSAT kujya ku butegetsi by'agateganyo, iyi nama yamusabye gutegura amatora mu minsi 60 kugira ngo ubutegetsi busubire mu maboko y'abasivile.

Ibinyamakuru muri Madagascar bivuga ko igihugu cyari kimaze ibyumweru mu mpagarara cyahise cyumvikanamo amajwi y'ibyishimo ku mihanda mu mujyi itandukanye, biba irindi tangiriro rishya, n'iherezo ry'ubutegetsi bwa Rajoelina wabugiyeho mu 2009 mu buryo busa n'ubwo avuyeho.

Amafoto

Col. Michael Randrianirina na bamwe mu bamurinda, ku wa kabiri mbere gato y'uko atangazwa nka Perezida wa Madagascar