Kigarama yasuye Urwibutso rwa Jenoside rwa Kigali n’Ingoro y’Amateka y’Urugamba rwo guhagarika Jenoside (Amafoto)

Abaturage batuye Umurenge wa Kigarama mu Karere ka Kirehe ho mu Ntara y’i Burasirazuba, basuye Urwibutso rwa Jenoside yakorewe Abatutsi mu 1994 rwa Kigali ku Gisozi ndetse n’Ingoro y’Amateka y’Urugamba rwo Guhagarika Jenoside.

Ibi bikorwa byombi babikoze ku wa Gatanu tariki ya 29 Gicurasi (5) 2026.

Iki gikorwa kiri mu bigize ibikorwa byo Kwibuka ku nshuro ya 32 Jenoside yakorewe Abatutsi mu 1994, bigamije gukomeza kwimakaza umuco wo kwibuka, kwigisha amateka nyayo no gukangurira abaturage uruhare rwabo mu kurinda ibyagezweho.

Abaturage bahagarariye abandi bikitabiriye, bari bayobowe n’Umunyamabanga Nshingwabikorwa w’Umurenge wa Kigarama, Nsengimana Janvier, afatanyije na Visi Perezida wa Ibuka mu Murenge wa Kigarama, Uwihanganye Nyundo Jean Marie Vianney.

Ku Rwibutso rwa Jenoside rwa Kigali, babanje guhabwa ibisobanuro birambuye ku mateka ya Jenoside yakorewe Abatutsi mu 1994, uburyo yateguwe, abayiteguye, uko yashyizwe mu bikowa ndetse n’ingaruka yagize ku gihugu n’umuryango nyarwanda muri rusange.

Banasobanuriwe imiterere y’uru Rwibutso n’ibice birugize, byubatswe hagamijwe kubungabunga amateka no guha icyubahiro inzirakarengane z’Abatutsi zishwe muri Jenoside.

Nyuma yo gusobanurirwa amateka no gusura ibice bigize uru Rwibutso, bunamiye inzirakarengane zirenga 250,000 ziharuhukiye, banashyira Indabo ku Mva zishyinguyemo imibiri y’Abatutsi bishwe muri Jenoside yakorewe Abatutsi mu 1994 nk’ikimenyetso cyo kubahoza ku mutima.

Nyuma yo gusura Urwibutso rwa Kigali, iri tsinda ryakomereje urugendo ku Ngoro y’Amateka y’Urugamba rwo Guhagarika Jenoside, iherereye ku Kimihurura mu Ngoro y’Inteko Ishinga Amategeko.

Kuri iyi Ngoro, basobanuriwe amateka y’urugamba rwagejeje ku kubohora Igihugu ndetse rugahagarika Jenoside yakorewe Abatutsi.

Beretswe kandi ibimenyetso n’amakuru agaragaza uko uru rugamba rwateguwe n’uburyo rwashyizwe mu bikorwa kugeza Jenoside ihagaritswe.

Gusobarurwa aya mateka, byakurikiwe no gusura ibice bitandukanye bigize iyo Ngoro, berekwa amateka y’urugamba rwo kubohora Igihugu, Ubutwari bw’abarugizemo uruhare ndetse n’amasomo yarukuwemo.

Mu kiganiro na THEUPDATE, akomoza kuri iki gikorwa, Umunyamabanga Nshingwabikorwa w’Umurenge wa Kigarama, Nsengimana Janvier, yavuze ko iki gikorwa ari ngaruka mwaka, kuri iyi nshuro cyari gikonzwe ku mwaka wa kabiri.

Ati:“Umwaka ushize twasuye Urwibutso rwa Jenoside yakorewe Abatutsi mu 1994 rwa Nyarubuye mu Karere ka Kirehe. Twahisemo ko mu gihe twibuka Jenoside yakorewe Abatutsi ku nshuro ya 32 twasura Urwibutso kwa Kigali ndetse  n’Ingoro y’Amateka y’Urugamba rwo Guhagarika Jenoside, kugira ngo abatuye Umurenge wa Kigarama n’abawukoreramo barusheo kumenya no gusobanukirwa amateka ashaririye Igihugu cyanyuzemo”.

Yunzemo ati:“Abitabiriye iki gikorwa twabasabye gukomeza kurwanya Ingengabitekerezo ya Jenoside no kugira uruhare mu kubaka ubumwe n’ubudaheranwa by’Abanyarwanda. Banibukijwe akamaro ko guhangana n’abahakana cyangwa abapfobya Jenoside yakorewe Abatutsi, binyuze mu gutanga amakuru y’ukuri agamije kunyomoza abayogoreka, kugira ngo amateka ya Jenoside yakorewe Abatutsi atazasigangana”.

Bamwe mu bitabiriye uru rugendo, bagaragaje ko gusura Urwibutso rwa Jenoside yakorewe Abatutsi mu 1994 rwa Kigali ku Gisozi ndetse n’Ingoro y’Amateka y’Urugamba rwo Guhagarika Jenoside byabafashije kurushaho gusobanukirwa amateka y’u Rwanda no kumva uburemere bwa Jenoside yakorewe Abatutsi, bavuga ko ari isomo rikomeye ribashishikariza gukomeza kurwanya icyatuma amateka nk’ayo yongera kubaho.

Urwibutso rwa Jenoside rwa yakorewe Abatutsi rwa Kigali ryatangiwe kubakwa mu mwaka w’i 1999. Rwafunguwe ku mugaragaro mu mwaka w’i 2004, mu gihe Ingoro y’Amateka y’Urugamba rwo Guhagarika Jenoside yakorewe Abatutsi mu 1994, yafunguwe ku mugaragaro tariki ya 13 Werurwe 2017.

Umurenge wa Kigarama ni umwe muri 12 igize Akarere ka Kirehe, ukaba uhana imbibi n’Imirenge ya ‘Musaza, Nyamugali, na Gahara’ ndetse n’Igihugu cya Tanzaniya.

Amafoto