Gakenke: Inkomezabigwi zasabwe kuba umusemburo w'impinduka nziza mu Muryango

Abitabiriye Itorero ry’Inkomezabigwi ku kiciro cya 13, basabwe guharanira impinduka nziza mu Muryango.

Itorero ry’Inkomezabigwi mu Karere ka Gakenke, riri gukorwa mu Mirenge 19 yose igize aka Karere ko mu Ntara y'Amajyaruguru y'u Rwanda.

Ryitabiriwe n’Abanyeshuri barangije Amashuri yisumbuye mu Mwaka w’Amashuri w'i 2024-2025.

Iri Torere ni kimwe mu bikorwa bigize Urugerero rw’Inkomezabigwi XIII ryatangijwe ku mugaragaro ku wa 13 Mutarama (1) 2026.

Ku rwego rw'Akarere, rwatangirijwe mu Murenge wa Muhondo.

Igikorwa cyo kuritangiza, kitabiriwe n’Umuyobozi w’Akarere wungirije ushinzwe Iterambere ry'Ubukungu, Bwana Niyonsenga Aimé François.

Abaryitabiriye (Intore), bahawe ibiganiro bitandukanye bigaruka ku ndangagaciro na kirazira by'Umuco Nyarwanda, imyitwarire ikwiye kuranga Intore, Amateka y'Itorero mu Rwanda n'uruhare rwaryo mu kubaka Umunyarwanda mu iterambere ry'Igihugu, banibutswa ibikorwa by'ingenzi bizibandwaho ku Rugerero.

Muri uyu muhango wo kuritangiza, Niyonsenga yabasabye kuba umusemburo w'impinduka nziza mu muryango no mu baturanyi, zishingiye ku ndangagaciro na kirazira z'umuco Nyarwanda, gutoza umuco wo kwigira, isuku, kwitabira gahunda za Leta ndetse no guharanira ubuzima buzira umuze.

Ati:“Turabasaba gukomeza kuba umusemburo w'impinduka nziza mu muryango no mu baturanyi zishingiye ku ndangagaciro na kirazira z’umuco Nyarwanda”.

Yunzemo ati:“Turabasaba kwesa imihigo muzahiga, abaturage b’Akarere ka Gakenke turi Abesamihigo. Turabasaba gukangurira abanyarwanda umuco wo kuzigama birinda gusesagura, no kumenya kubaho mu bushobozi bwabo”.

Urugerero rw’Inkomezabigwi XIII rwatangijwe ku wa 13 Mutarama (1) 2026, ruzasozwa ku wa 16 Gashyantare (2) 2026.

Biteganyijwe hazakorwa ibikorwa bitandukanye birimo “Kubakira abatishoboye, gukora isuku no gukangurira abaturage gahunda zitandukanye za Leta”. 

Mu Karere ka Gakenke, hari gutozwa Intore zisaga 1400 mu Mirenge yose 19 ikagize.

Amafoto