Croix Rouge yahawe kuyobora ibikorwa byo guhererekanya Imfungwa hagati ya DR – Congo na M23

Komite mpuzamahanga ya Croix Rouge [ICRC], igiye guhagararira ibikorwa byo guhererekanya Imfungwa hagati ya Leta ya Repubulika ya Demokarasi ya Congo n'Umutwe w'Inyeshyamba wa AFC/M23.

Aya makueu yatangajwe na Minisiteri y'Ububanyi n'Amahanga y'Igihugu cya Qatar, Igihugu kiyemeje gushakira umuti ikibazo cy'Umutekano mucye umaze Imyaka hafi 30 mu Burasirazuba bwa Repubulika ya Demokarasi ya Congo.

Amakuru yo guhererekanya izi Mfungwa, yatangajwe ku nshuro ya mbere tariki ya 12 Nzeri [9] 2025, na Masad Boulos, Umujyanama wihariye wa Perezida wa Leta zunze Ubumwe z'Amerika, Donald Trump, ushinzwe ibibazo by'Afurika by'umwihariko.

Kuri uyu wa 15 Nzeri [9] 2025, nibwo ICRC yashyikirijwe amasezerano yo guhagararira iki gikorwa, mu muhango wari witabiriwe n'abahagarariye Repubulika ya Demokarasi ya Congo n'Umutwe wa AFC/M23.

Aya masezerano aha uburenganzira ICRC bwo gukurikirana uko izi Mfungwa zizaguranwa binyuze mu mucyo, ku buryo buri ruhande ruzagerwaho n'abantu babo nta mananiza.

Itangazo rijyakurikiye guha uburenganzira ICRC, rivuga ko amasezerano yasinywe ari intambwe idasubira inyuma y'inzira iganisha ku mahoro arambye mu Burasirazuba bwa Repubulika ya Demokarasi ya Congo.

Minisiteri y'Ububanyi n'Amahanga ya Qatar, ivuga ko yizeye ko impande zombi zizabyaza umusaruro aya masezerano, ndetse no guha amahirwe ibikorwa bitabangamira uburenganzira bwa muntu.

Ntabwo ari ku nshuro ya mbere ICRC igiye gukora igikorwa nk'iki, kuko hagati y'Ukwezi kwa Mata na Gicurasi Umwaka ushize [2024], hashyikirije Leta ya Repubulika ya Demokarasi ya Congo Abahoze ari Abarwanyi 1300, bavanywe mu Mujyi wa Goma nyuma yo gusumbirizwa na AFC/M23, bajyanwa i Kinshasa.

Amafoto