Amajonjora y'Igikombe cy'Isi: Shema yasabye Amavubi kwitandukanya n'imyumvire yo kwemera gutsindwa

Dr. Shema Ngoga Fabrice, yabwiye abakinnyi b'Ikipe y'Igihugu y'u Rwanda Amavubi, ko gutsindwa ari amakosa ku buyobozi bwe.

Shema yatorewe kuyobora Ishyirahamwe rya Ruhago mu Rwanda, FERWAFA, ku wa Gatandatu w'Icyumweru gishize, mu matora yabereye kuri Serena Hotel mu Mujyi wa Kigali.

Urugendo rwe rwa mbere nka Perezida wa FERWAFA, yaherekeje Amavubi muri Nijeriya, mu mikino y'amajonjora yo gushaka itike y'Igikombe cy'Isi kibera muri USA, Canada na Mexique mu Mpeshyi y'Umwaka utaha w'i 2026.

Nyuma yo gukina na Nijeriya, u Rwanda ruzakomereza muri Afurika y'Epfo, gukina umukino rufitanye na Zimbabwe.

Umukino u Rwanda ruzahuramo na Nijeriya, ni uw'umunsi wa 7 mu gihe uwa Zimbabwe ari uw'umunsi wa 8 w'iyo gushaka Itike y'Igikombe cy'Isi.

Mu kiganiro n'Itangazamakuru i Lagos muri Nijeriya, Dr. Shema yavuze ko guhararira Ikipe y'Igihugu, ari iby'agaciro kurusha inyungu z'umuntu ki giti cye.

Ati:“Ni ibintu byiza. N'iby'agaciro guherekeza Ikipe y'Igihugu. Abakinnyi barasabwa kwitwara neza, kuko abatoranyijwe baba bahagarariye Abanyarwanda bose, kandi nabo bakabasaba intsinzi. Ndasaba Abakinnyi gukorera hamwe bakitangira Igihugu, aho kugira ngo Umukinnyi akine ku giti cye”.

Yunzemo ati:“Muri Manda y'Imyaka 4 twatorewe, imyumvire yo kwemera gutsindwa, ikwiriye gucika mu bantu. Njye ntabwo nyemera, bivuze ko n'abandi bigomba kuba gutyo. Ntabwo gutsindwa bikwiriye kuba ikintu gisanzwe. Gutsindwa ntabwo bigomba kuba kuba amahitamo ku mukinnyi wese wahagarariye Igihugu, iyi myumvire bagomba kuyijyana mu kibuga”.

Mu mikino y'amajonjora yo gushaka Itike y'Igikombe cy'Isi, u Rwanda ruri ku mwanya wa kabiri n'amanota 8, inyuma ya Afurika y'Epfo ifite amanota 13, nyuma y'imikino 6 imaze gukinwa.

U Rwanda ntiruritabira Imikino ya nyuma y'Igikombe cy'Isi inshuro n'imwe mu kiciro cy'abakinnyi bakuru, uretse mu 2011 ubwo rwitabiraga icy'abatarengeje Imyaka 17 cyakiniwe mu gihugu cya Mexique.

Amafoto