Amafoto: Perezida wa Sénégal yunamiye abaruhukiye mu Rwibutso rwa Jenoside yakorewe Abatutsi rwa Kigali

Perezida wa Sénégal, Bassirou Diomaye Diakhar Faye, uri mu ruzinduko rw'akazi rw'iminsi itatu mu Rwanda, yasuye Urwibutso rwa Jenoside yakorewe Abatutsi rwa Kigali ku Gisozi, yunamira inzirakarengane zirenga Ibihumbi 250 ziharuhukiye. 

Faye yageze mu Rwanda tariki ya 17 Ukwakira (10) 2025, ku Kibuga cy'Indege i Kanombe, yakirwa na mugenzi we, Perezida Paul Kagame.

Mbere yo gusura Urwibutso rwa Jenoside rwa Kigali, Faye yabanje kwakira mu Biro bya Perezida wa Repubulika y'u Rwanda, Village Urugwiro, mu muhango yahawemo Icyubahiro gihabwa Abaperezida basura u Rwanda.

Ku Rwibutso rwa Kigali, yaherekejwe n’itsinda ry'abayobozi bakuru muri Guverinoma y'u Rwanda, barimo Minisitiri w'Ububanyi n'Amahanga n'Ubutwererane, Olivier Jean Patrick Nduhungirehe, Minisitiri w'Ubumwe bw'Abanyarwanda n'inshingano mboneragihugu, Jean Damascène Bizimana n'abandi.. 

Aha ku rwibutso rwa Kigali, Perezida Faye yeretswe amashusho y’ubuhamya bugaragaza ibyabaye muri Jenoside yakorewe Abatutsi mu 1994, uko umugambi wayo wateguwe n’uko washyizwe mu bikorwa.

Yanasangijwe urugendo rwo kongera kwiyubaka k’u Rwanda mu myaka 31 ishize.

Ni urugendo rwaranze no kwimakaza Ubumwe n'Ubudaheranwa by'Abanyarwanda.

Perezida Faye yatorewe kuyobora Senegal muri Mata y'Umwaka ushize (2024), asimbuye Macky Sall.

Nyuma yo gutorerwa kuyobora Sénégal, Perezida Kagame niwe mukuru w'Igihugu cy'Amahanga wa mbere, wagiye muri Senegal kumwifuriza ishya n'ihirwe mu mirimo mishya.

Kugeza ubu, mu Rwanda hari Diaspora nini y'Abanya- Sénégal, basaga 150. Bakora imirimo itandukanye, irimo iy'ubudozi bugezweho n'ibindi.

Faye wageze ku Rwanda ku wa Gatanu, arasubira i Dakar kuri iki Cyumweru.

Uruzinduko rwe i Kigali, rushimangira ikimenyetso cy'umubano nta makemwa uri hagati y'Ibihugu byombi, cyane ko Ibihugu byombi byanasinye amasezerano y'ubufatanye atandukanye, arimo n'ajyanye no guteza imbere Siporo.

Mu Mwaka utaha, Sénégal izakira Imikino Olempike y'Urubyiruko ku rwego rw'Isi, bikazaba ari no ku nshuro ya mbere iyi mikino ikiniwe ku Mugabane w'Afurika.

Amafoto