Amafoto: Federasiyo ya Badminton yungutse 'abasifuzi n'abategura amarushanwa' bashya

Ishyirahamwe ry'Umukino wa Badminton mu Rwanda, ryungutse abasifuzi n'abashinzwe gutegura amarushanwa bashya.

Uyu musaruro wavuye mu mahugurwa iri Shyirahamwe ryateguye hagati ya tariki ya 28 Nyakanga n'iya 02 Kanama 2025.

Abahuguwe n'abashinzwe gutegura amarushanwa 7, n'abasifuzi 11, mu gihe abatoza 9 bangorewe ubumenyi hagamijwe kubategura kujya ku rwego rwa mbere [Level 1].

Uko ari abantu 27, barimo n'abakina Umukino wa Badminton mu kiciro cy'abafite Ubumuga.

Aya mahugurwa yitabiriwe n'abavuye mu Turere twa: Huye, Musanze, Rulindo, Bugesera, ndetse n'abo mu Mujyi wa Kigali.

N'amahugurwa yatanzwe n'Umuyobozi wungirije w'Ishyirahamwe rya Badminton mu Bufaransa, Catherine le Saint, Pierre Marie Boudouin na Gooneadry Diraj Dev.

Catherine yahuguye by'umwihariko ikiciro cy'Abasifuzi, mu gihe Marie Boudouin yibanze ku kiciro cy'Abatoza.

Gooneadry Diraj Dev, Inzobere mpuzamahanga yo mu Birwa bya Mauritius, wari woherejwe n'Impuzamashyirahamwe y'Umukino wa Badminton muri Afurika [BCA], yatanze amahugurwa ajyanye n'uko amarushanwa y'uyu mukino ategurwa, by'umwihariko ayo ku rwego mpuzamahanga.

Diraj Dev n'umwe mu basifuzi 2 Umugabane w'Afurika ufite, bafite ubumenyi bwo gusifura no gutegura amarushanwa, nk'uko byemejwe n'Impuzamashyirahamwe y'Umukino wa Badminton ku Isi [BWF].

Yitabiriwe n'Umuyobozi muri Minisiteri ya Siporo ushinzwe Amashyirahamwe, Bisangabagabo Emilien, Umuyobozi wungirije wa Komite Olempike y'u Rwanda, Umutoni Salama n'Umuyobozi w'Ishyirahamwe rya Badminton, Muhama Alphonse.

Umukino wa Badminton watangiwe gukinwa mu Rwanda hagati y'Umwaka w'i 2007 na 2008.

Tariki ya 22 Ukuboza mu 2007, Hotel Novotel yakiriwe Irushanwa rya mbere ry'uyu mukino.

Mu Kwezi kwa Gicurasi y'i 2008, Nyarutarama Badminton Club yashinzwe nk'Ikipe ya mbere y'umukino wa Badminton mu Mujyi wa Kigali.

Hagati ya tariki ya 03 n'iya 07 Mutarama 2024, Ishyirahamwe ry'Umukino wa Badminton mu Rwanda, ryemejwe nk'Umunyamuryango w'Impuzamashyirahamwe ya Badminton muri Afurika no ku Isi.

Mu mukino wa Badminton, abakinnyi batanguranwa amaseti 2. Iseti imwe iba igizwe n'amanota 21, iyo banganyije iseti 1 kuri 1, bakina iyo kubakiranura.

Kugira ngo Iseti iboneke, bisaba ko abakinnyi batandukanywa n'amanota 2.

Mu gihe ayo manota binaniranye ko aboneka, bakomeza gukina kugeza ku manota 30.

Ikibuga gikinirwaho Badminton, kijyamo abakinnyi 2, buri mukinnyi akajya ku ruhande [Igice] rwe.

Uretse abakinnyi 2, Badminton ikinwa mu buryo bw'amakipe, aho abakinnyi bafatanya, Ikibuga kikajyamo abakinnyi 4.

Abakinnyi bakina mu buryo bw'amakipe, bashobora gukina ari Ikipe gizwe n'abahungu gusa, abakobwa gusa cyangwa Ikipe igizwe n'Umukinnyi w'Umuhungu n'uw'Umukobwa.

Ikibuga gikinirwamo Badminton kiba kireshya na Metero 13 na Santimetero 40.

Abakinnyi bakina batandukanyijwe n'Urushundura [Filet/Net], rureshya na Metero 1 na Santimetero 55 uvuye ku Butaka ujya hejuru, rugashyirwa kuri Metero 6 na Santimetero 10 uvuye ku mpera y'Ikibuga.

Amafoto