Volleyball: Umufaransa “Frédéric Guérin” mu nzira zo kugirwa Umutoza w'Ikipe y'Igihugu y'u Rwanda

Umutoza mpuzamahanga w'Umufaransa, Frédéric Guérin, arakoza imitwe y'intoki ku kazi ko gutoza Ikipe y'Igihugu y'u Rwanda ya Volleyball, mu kiciro cy'abagabo n'abagore.

Uyu mugabo w'Imyaka 52 y'amavuko, niwe uri mu mwanya mwiza wo gusimbura Umunya-Brazil, Paulo de Tarso, werekeje muri Kameroni, nyuma y'uko yitwaye neza mu kiganiro (Interview), yagiranye n'abashinzwe gutanga akazi ko gutoza Ikipe y'Igihugu.

Amakuru THEUPDATE ifite, ni uko ibiganiro bya nyuma ku bijyanye n'umushahara azahembwa ndetse n'ibindi bizamufasha kunoza akazi ke, biri kugana ku musozo.

Ntagihindutse, biteganyijwe ko Ishyirahamwe rya Volleyball mu Rwanda, FRVB, rizamutanga mu mpera z'uku Kwezi cyangwa mu ntangiriro z'ugutaha, akazatangarizwa rimwe n'itsinda ry'abazaba bamwungirije.

Guérin, ni umwe mu batoza bazwiho kuzamura impano z'abakiri bato by'umwihariko ku Mugabane w'u Burayi, ibi bikaba ari bimwe mu byo yitezweho mu gihe azaba atangiye akazi i Kigali.

Mbere yo gutangira kwinjira mu kazi ko gutoza amakipe y'Ibihugu, Guérin, yatoje muri Shampiyona y'ikiciro cya mbere n'icya kabiri mu Bufaransa.

Yanyuze mu makipe arimo “AS Cannes, Nice Volley-Ball ndetse na Cambrai Volley”.

Zimwe mu nshingano z'ibanze zizaba zimutegereje, zirimo gutegura Ikipe y'Igihugu mu bagabo, izitabira Imikino ya Shampiyona y'Afurika iteganyijwe kubera muri Repubulika ya Demokarasi ya Congo, hagati ya tariki 10 na 15 Nzeri (9) muri uyu Mwaka (2026).

Iyi mikino izakinirwa muri Repubulika ya Demokarasi ya Congo, izatanga itike ya Shampiyona y'Isi yo mu 2027 ndetse n'iy'imikino Olempike yo mu Mpeshyi, izakinirwa i Los Angeles muri Leta zunze ubumwe za Amerika mu 2028.

Mu mikino ya Shampiyona y'Afurika iheruka gukinirwa mu Misiri mu 2023, Ikipe y'Igihugu ya Misiri yarayegukanye itsinze Algeria amaseti 3–1, mu gihe u Rwanda rwasoreje mu mwanya wa gatandatu. (The Newtimes)