Inyubako y’Inkundamahoro yafunguwe nyuma y’iminsi itatu ifunzwe

Umujyi wa Kigali wafunguye inyubako y’ubucuruzi izwi nk’Inkundamahoro nyuma y’iminsi itatu yari imaze ifunze.

Iyi nyubako iherereye Nyabugogo, yafunzwe hashingiye ku kutubahiriza ibisabwa bijyanye n’isuku, umutekano no kubungabunga ibidukikije.

Itangazo ry’Umujyi wa Kigali ryo ku wa 11 Kanama 2026 ryemeje ko iyi nyubako yongeye gufungurwa nyuma y’uko ubuyobozi bwayo butangiye gushyira mu bikorwa amabwiriza yari yarahawe agamije gukemura ibibazo byagaragajwe n’ubugenzuzi.

Inkundamahoro yafunzwe by’agateganyo ku wa 8 Kanama 2026, nyuma y’uko Umujyi wa Kigali uvuze ko ubuyobozi bwayo bwari bwarahawe amabwiriza n’integuza zitandukanye hagati ya Gicurasi na Kanama 2026, bikimwa amatwi.

Kimwe mu bibazo bikomeye byari ugufata amazi yanduye arimo na y’imyanda iva mu bwiherero.

Nyuma y’iminsi itatu, Umujyi wa Kigali watangaje ko iyi nyubako yongeye gufungurwa, ariko ushimangira ko ibikorwa byo gukosora ibibazo byari byashingiweho ifungwa bitararangira.

Mu rwego rwo gushakira umuti iki kibazo, Ubuyobozi bw’Inkundamahoro bwasabwe gukomeza gushyira mu bikorwa ibyo bwasabwe byose, birimo gushyiraho uburyo bwizewe bwo gutunganya amazi yanduye, gukusanya no gutwara imyanda buri munsi hakurikijwe amabwiriza, gusana no gusiga amarangi ndetse no gukomeza kunoza ibindi bijyanye n’isuku n’umutekano.

Umujyi wa Kigali kandi wibukije abakorera muri iyi nyubako ko bafite uruhare mu kubungabunga isuku y’aho bakorera, cyane ko ari ahantu hahurira abantu benshi kandi hakorerwa ibikorwa bitandukanye by’ubucuruzi na serivisi.

Inkundamahoro ikorerwamo ibikorwa byinshi by’ubucuruzi na serivisi.

Muri byo harimo ibigo by’imari, ubucuruzi bw’ibicuruzwa bitandukanye n’izindi serivisi.

Muri ibi bikorwa, harimo ibya JALI Savings & Credit PLC, AB Rwanda Plc, I&M Bank Rwanda, Palochem, Unimoni n’ibindi.