Iran igiye guhindura uburyo bw’imirwanire mu ntambara iyihanganishije na Isiraheli na Amerika

Mu gihe hagiye gushira hafi Ibyumweru bibiri Iran igabweho Igitero cya Gisirikare n’Ibihugu bya Isiraheli ifatanyije na Leta Zunze Ubumwe za Amerika, iki gihugu cyo mu Burasirazuba bwo hagati, cyatangaje ko kigiye guhindura uburyo Abasirikare bacyo barwanamo Intambara yakurikiye iki gitero cyanahitanye abarimo Umuyobozi w’Ikirenga wa Repubulika ya Kiyisiramu ya Iran.

Abayobozi b’Ingabo z’impinduramatwara ya Kiyisiramu ya Iran (IRGC), bavuga ko bagomba kwibasira ahari intege nke za Leta Zunze Ubumwe za Amerika na Isiraheli.

Ibi, bigomba gukorwa Abasirikare birinda ibitero byo mu Kirere by’Ingabo za Leta Zunze Ubumwe za Amerika na Isiraheli ndetse no kwibasira ahari Abasirikare ba Leta Zunze Ubumwe za Amerika mu bihugu byo mu Kigobe ndetse n’ibikoresho byabo.

Mu rwego rwo gutera akanyabugabo Ingabo za Iran ndetse no kwereka abaturage bakabakaba Miliyoni 100 ba Iran, mu masangano y’umwe mu Mihanda minini muri Iran, hashyizwe Icyapa kigaragaza ifoto iriho Abayobozi 3 b’Ikirenga ba Iran n’uko bagiye basimburana, Ifoto bemeza ko ari ikimenyetso cy’ubumwe bw’abatuye Iran.

Nyuma y’Iminsi 11 iyi Ntambara itangiye, hamaze kwangirika ibitari bicye, aho abahanga mu by’Intambara n’Ubukungu, bavuga ko buri munsi ‘Amafaranga arenga Miliyari y’Amadorali’ afatwa nk’ikiguzi cy’iyi Ntambara.

Mu gihe bimeze gutya, buri ruhande rurivuga imyato, haba ku ruhande rwa za Leta Zunze Ubumwe za Amerika na Isiraheli, Perezida Trump na Minisitiri w’Intebe Benjamin Netanyahu, bavuga ko bari kwitwara neza ku rubuga rw’Imirwano.

Nyamara, Iran nayo ivuga ko itatereye agati mu ryinnyo, kuko Amerika yemeye ko Abasirikare bayo 7 bamaze kugwa muri iyi Ntambara, n’ubwo abahanga mu by’Intambara bavuga ko uyu mubare atari ukuri, ko ahubwo abamaze gupfa barenga abatangajwe.

Amatsinda y’Abarwanyi bashyigikiwe Iran, yagabye ibitero kuri za Hoteli zikunze gucumbikirwamo Abasirikare ba Amerika ndetse n’abandi bakerarugendo, ibyafashwe nko guhangana byeruye.

Umwe mu Mitwe y’abarwanyi yo muri Iraq ishyigikiye Iran, wagabye igitero cya Drones nyinshi, kuri Hoteli ifatwa nk’imwe mu zihagazeho ziri mu Mujyi wa Erbil.

Ibi byagaragaje ko Iran yari izi ko Minisiteri y’Ingabo muri Leta Zunze Ubumwe za Amerika (Pentagon), icumbikira Abasirikare bayo muri za Hoteli zo muri ako karere, nk’uko umuyobozi mukuru w’Ingabo za Amerika yabivuze.

N’ubwo Iran idafite Misire zishobora kurasa kugeza muri Leta Zunze Ubumwe za Amerika, ivuga ko kwibasira inyungu z’iki gihugu gifatwa nk’igihangange ku Isi, ari intsinzi, mu gihe Amerika ivuga ko izaruhuka igeze ku ntsinzi yuzuye.

Ifoto

Ifioto igaragaza Ayatollah Ruhollah Khomeini, Ali Khamenei na Mojtaba Khamenei, yashyizwe rwagati mu Mihanda yo muri Iran.