Ibyo kumenya kuri ‘Yildirimhan’ misile nshya ya Turikiya iraswa ku ntera ya 6,000km

Igihugu cya Turikiya cyamuritse Misile yahawe izina rya ‘Yildirimhan’, ishobora kuraswa kugeza ku ntera ya Kilometero Ibihumbi Bitandatu (6,000km).

Yildirimhan yamuritswe n’Ikigo cy’ubushakashatsi n’iterambere cya Minisiteri y’Ingabo ya Turukiya.

Yerekanywe ku munsi wa mbere w’imurikagurisha mpuzamahanga ry’Ingabo, Indege ndetse n’Ikoranabuhanga ryo mu kirere.

Iri murikagurisha ryiswe ‘Saha-2026’ ryabereye i Istanbul, ku murwa mukuru w’Ubucuruza w’Igihugu cya Turukiya.

Kimwe mu bice bigize iyi shusho, kigaragaraho Bayezid wa mbere, Sultani w’Ubwami bwa Ottoman wamenyakanye nka ‘Yildirim’.

Yildirim ni izina ryihariye muri Turikiya ndetse n’icyahoze ari Ubwami bw’Abami bwa Ottoman, kuko risobanura ‘Inkuba’.

Uretse iyi shusho ya ‘Yildirim’, hagaragaraho kandi umukono (Signature) ya Field Marshal Mustafa Kemal Atatürk, wabaye Perezida wa mbere wa Turukiya.

Atatürk ufatwa nk’uwashinze Turukiya, umukono we ugaragara ahagana imbere kuri iyi Misile.

Akomoza kuri iyi Misile, Minisitiri w’Ingabo wa Turukiya, Yaşar Güler, yabwiye Itangazamakuru ko ariyo ntwaro ikomeye kurusha izindi berekanye, ndetse iyo imaze kuraswa, igenda ku muvuduko udasanzwe.

Iyi Misile yamuritswe mu gihe hashize iminsi Turikiya ihindutse isoko ry’Ibihugu bitandukanye mu Isi cyane ibya Afurika ku bijyanye no kuyiguramo ibikoresho bya gisirikare by’umwihariko Indege zitwara zizwi nka ‘Drones’.

Yildirimhan ije ikurikira Typhoon Block-4, yamuritswe mu imurikagurisha nk’iri ryo mu Mwaka ushize.

Typhoon Block-4 yakozwe na Roketsan, ikaba ifatwa nk’imwe mu ntwaro za gisirikare zigezweho.

Imurikwa, hafuzwe ko ireshya na Metero 10 z’uburebure, ndetse ikaba ipima uburemere bwa Toni 7 n’Ibiro 200.

Mu ntambara zisigaye zirwanwa muri iyi Myaka, Ibisasu bya Misile biraswa kure cyane bizwi nka ‘Intercontinental Ballistic Missiles (ICBM)’, ni Intwaro zagenewe kurasa intego iri mu ntera ndende cyane.

Buri Misile ishobora gutwara imitwe myinshi y’ibindi bisasu (Warheads), kandi buri mutwe ufite ubushobozi bwo kuyoborwa ku giti cyawo no kurasa aho woherejwe.

Ibihugu nk’Uburusiya, Leta Zunze Ubumwe za Amerika ndetse n’Ubushinwa, biri ku isonga mu bitunze ubwo bwoko.

Uretse ibi kandi, Ibihugu nk’Ubwongereza, Ubufaransa, Ubuhinde, Koreya ya Ruguru, Isiraheli na Irani, biza ku mwanya wa kabiri mu bifite ubu bwoko bwa Misile.

Zimwe muri izi Misile, zishobora gutwara imitwe y’Ibisasu bya Nikleyeri, ariko zishobora no gukoreshwa nk’Ibisasu bisanzwe.

Misile zisanzwe zikoreshwa mu kurasa, zishobora kurasa ku ntera iri hagati ya Kilometero 300 na 5.500, mu gihe zimwe mu zo twagarutseho, zishobora kugeza ku ntera ya Kilometero Ibihumbi Icumi (10,000).