Gatera Moussa yagizwe Umutoza wa AS Muhanga mu gihe cy'Imyaka 2

Ikipe y'Akarere ka Muhanga, AS Muhanga, yasinyishije Moussa Gatera nk'Umutoza wayo mu gihe cy'Imyaka ibiri [2] iri imbere.

Amakuru y'isinya rya Gatera Moussa, aje mu gihe iyi Kipe yatsindiye kuzakina Shampiyona y'Ikiciro cya mbere mu Mwaka w'imikino utaha [2025-26].

N'ubwo bivugawa ko yamaze kwemeranya na AS Muhanga, Ikipe ya Rutsiro FC yari asanzwe, yateye utwatsi iby'aya makuru, ivuga ko ikimufata nk'umukozi wayo kugeza muri Kamena [6] y'i 2026, nk'uko amasezerano impande zombi zifitanye abivuga.

Nyamara, amakuru ava hafi y'ubuyobozi bwa AS Muhanga, avuga ko Rutsiro FC iri gutera iyaretswe, kuko Moussa biteganyijwe ko azatangira akazi gashya tariki ya 07 Nyakanga [7] 2025, bivuze ko ari ku wa Mbere w'Icyumweru gitaha.

AS Muhanga, yatsindiye kuzamuha mu kiciro cya mbere cya Shampiyona y'Umupira w'amaguru mu Rwanda, nyuma y'Imyaka itanu [5] ikina iy'icya kabiri.

Kuzamuka muri iki kiciro, yabifashijwemo n'Umutoza Gaspard Munyeshema, wahise agongwa no kutagira ibyangombwa bisabwa abatoza b'ikiciro cya mbere.

Nyuma yo kugongwa no kutagira ibyangombwa, Gaspard Munyeshema yahise yerekeza muri Sunrise FC, ahasinya amasezerano y'Umwaka, mu rwego rwo kuyifasha kugaruka mu kiciro cya mbere.

N'ubwo ubuyobozi bwa Rutsiro FC budakozwa amakuru yo gutandukana na Moussa, biravugwa ko buri mu biganiro n'abandi batoza barimo: Sosthene Habimana watandukanye na Musanze FC, Emmanuel Ruremesha watozaga  Muhazi United mbere y'uko imanuka mu kiciro cya kabiri na Abdou Mbarushimana.

Gatera Moussa n'umwe mu batoza bafite uburaribonye mu mupira w'amaguru imbere mu gihugu, cyane ko yatoza amakipe arimo: Sunrise FC, Isonga FC na Rayon Sports FC nk'umutoza wungirije, ndetse n'Ikipe y'Igihugu y'abatarengeje Imyaka 17,

Yatoje kandi, Espoir FC, Gorilla FC na Rutsiro FC yari amazemo Imyaka hafi 3.