DR – Congo na AFC/M23 basinyanye amasezerano yo kugenzura no kwemeza ihagarikwa ry'Imirwano

Minisiteri y'Ububanyi n'Amahanga y'Igihugu cya Qatar, yatangaje ko Repubulika ya Demokarasi ya Congo n'Umutwe wa AFC/M23, bashyize umukono ku masezerano yo kugenzura no kwemeza ihagarikwa ry'Imirwano

Ibinyujije mu itangazo yashyize ku rubuga rwayo rwa X yahoze ari Twitter, Minisiteri y'Ububanyi n'Amahanga y'Igihugu cya Qatar, yavuze ko aya masezerano yashyizweho umukono kuri uyu wa 14 Ukwakira [10] 2025.

Iyi Minisiteri ikomeza ivuga ko, agamije gushyira mu ngiro, ibyo impande zombi ziyemeje tariki ya 19 Nyakanga [7] 2025.

Muri iri tangazo, impande zombi “Leta ya Repubulika ya Demokarasi ya Congo na Alliance Fleuve Congo (AFC/23)”, bemeranyijwe ko bemeje itangira ryo guhana agahenge k'Intambara, gukurikirana abazakarengaho ndetse no guha amakuru impande zose bireba, mu gihe haramuka hagize uruhande runyuranya n'ibyo bemeranyijweho, muri aya masezerano basinyiye i Doha.

Mu rwego rwo gushyira mu bikorwa ibyo impande zombi zashyizeho umukono, Ibihugu bya Qatar, Leta zunze Ubumwe z'Amerika n'Umuryango w'Afurika yunze Ubumwe, bazayakurikiranira hafi, hagamijwe gushyigikira uruhare rw'Ibihugu byo mu Karere ndetse na mpuzamahanga, mu guharanira ko Ibiyaga bigari byagira amahoro arambye.

Iri tangazo, risoza rishimira umuhate n'imbaraga z'Ibihugu bya  Qatar, Leta zunze Ubumwe z'Amerika, Tpgo n'Umuryango w'Afurika yunze Ubumwe, mu guharanira ko Uburasirazuba bwa Repubulika ya Demokarasi ya Congo bwagira amahoro arambye.

Intambara ikomeje guca ibintu mu Burasirazuba bwa Repubulika ya Demokarasi ya Congo, imaze hafi Imyaka 30, gusa ishyamiranyije Ingabo za Leta ya Repubulika ya Demokarasi ya Congo na AFC/M23, yatangiye mu 2021, ifata umurego mu ntangiro z'uyu Mwaka, ubwo Umutwe wa M23, Ishami ry'Ingabo rya AFC, wafataga Umujyi wa Goma n'uwa Bukavu.

Amafoto

DR – Congo na AFC/M23 basinyanye amasezerano yo kugenzura no kwemeza ihagarikwa ry'Imirwano