VAR igiye gutangira gukoreshwa muri Shampiyona y'u Rwanda

Umuyobozi w'Ishyirahamwe rya ruhago mu Rwanda (FERWAFA), Bwana Shema Ngoga Fabrice, yatangaje ko VAR (Video Assistant Referee), izatangira kugeragezwa mu mikino yo kwishyura, ya Shampiyona y'i 2025-26.

Ubu buryo bukoreshwa mu gufasha abasifuzi gutanga ubutabera bunoze mu kibuga, bwitezweho kuzagabanga impaka zikunze gukurikira ibyemezo biba byafashwe n'abasifuzi.

Mbere y'uko butangira gukoreshwa, abasifuzi bo mu Rwanda, bagiye guhabwa amahugurwa yihariye, mu rwego rwo kubatyaza.

Nyuma y'uko gukoresha VAR bizaba bimaze gushinga imizi, byitezwe ko mu Mwaka w'imikino utaha (2026-27), izakoreshwa mu mikino yose.

Shema yatangaje ibi, mu kiganiro yagiranye n'itangazamakuru kuri uyu wa mbere ku kicaroo cya FERWAFA.

Iki kiganiro cyari kitabiriwe n'umuyobozi wa Rwanda Premier League, Hadji Mudaheranwa, cyanagarutse ku gushimangira ko amakipe atatu yo muri Sudani, yamaze kwererwa gukina muri Shampiyona y'u Rwanda.

Mu gihe abakunzi ba ruhago bari bamaze iminsi binubira ikijyanye n'imisifurire, FERWAFA ikaba yarabishimangiye ifatira bamwe mu basifuzi ibihano, Shema yavuze ko VAR izafasha mu gutanga ubutabera mu kibuga.

Ati:“Ikicaro cya VAR muri CECAFA kiri muri Tanzaniya. Navuganye n'abayobozi bayishinzwe, mbabwira ko ntacyo byatumarira koherezayo abasifuzi 2 mu basaga 200 dufite, ngo abe ari bahugurwa gusa. Nabandikiye mbasaba ko batwoherereza inzobere mu kuyikoresha, zikaza mu Rwanda guhugura umubare munini w'abasifuzi, bityo ubwo bumenyi bukagera kuri benshi”.

Yunzemo ati:“Ntagihindutse, biteganyijwe ko VAR izakoreshwa muri imwe mu mikino yo kwishyura ya Shampiyona”.

Kugeza ubu, mu bibuga (Sitade) bitandukanye biri mu gihugu, VAR iri kuri Sitade Amahoro gusa.

Mu gihe izaba imaze gutangira gukoresha mu Rwanda, Shampiyona y'u Rwanda, izaba yinjiye mu zindi zitandukanye zo ku Mugabane w'Afurika ziyikoresha, zirimo nka Shampiyona ya “Tanzaniya, Maroke n'izindi...”