Uruzinduko rwa Young Africans: Yasuye Urwibutso rwa Jenoside, inahiga gutsinda Rayon Sports

Ikipe ya Young Africans SC iri mu Rwanda ku butumire yahawe na Rayon Sports, mu bikorwa bizaranga Umunsi w'Igikundiro, uteganyijwe kuri uyu wa Gatanu tariki ya 15 Kanam [8] 2025.

Iyi Kipe yo mu gihugu cya Tanzaniya, yasuye Urwibutso rwa Jenoside yakorewe Abatutsi rwa Kigali, ku Gisozi, mbere yo gutemberezwa Sitade Amahoro mu masaha ya nyuma ya saa Sita.

Uretse gusira Urwibutso rwa Kigali ruruhukiyemo Imibiri y'Abatutsi barenga Ibihumbi 250 bishwe muri Jenoside yakorewe Abatutsi mu 1994 no gutemberezwa Sitade Amahoro, Young Africans SC yanasuye Ambasade y'Igihugu cya Tanzaniya, yubatse i Nyarutarama mu Mujyi wa Kigali.

Ku Rwibutso rwa Jenoside rwa Kigali, Young Africans SC, yaherekejwe na bamwe mu bayobozi b'Ikipe ya Rayon Sports, barimo na Twagirayezu Thaddée.

Mu kiganiro n'Itangazamakuru, Umutoza wa Young Africans SC, Romain Folz, yatangaje ko intego ari gutsinda Rayon Sports kuri uyu wa Gatanu.

Umukino uzahuza aya makipe yombi, uteganyijwe ku Isaha ya saa 18:00, ukazakinirwa muri Sitade Amahoro i Remera mu Mujyi wa Kigali.

Mu gihe Romain Folz yikomangaga mu gatuza, Afahmia Lofti wa Rayon Sports, nawe yavuze ko bazereka Young Africans SC ko batari Agafu k'imvugwarimwe.

Lofti yunganiwe na Abedi Bigirimana wavuze mu izina rya bagenzi be, ashimangira ko n'ubwo Young Africans SC ari Ikipe ikomeye mu Karere no muri Afurika, bizeza Abafana kuzayihangamura.

Bombi bashimangiye ko, bagomba kwereka Abafana ko Rayon Sports yambariye urugamba rwo kuzahatana mu marushanwa mpuzamahanga muri uyu Mwaka w'imikino w'i 2025-26.

Tugarutse ku gutemberezwa Sitade Amahoro, Umuyobozi wa Young Africans SC, Eng. Hersi Said, yashimye uburyo ari Igikorwaremezo kiri ku rwego mpuzamahanga, abishimangirisha ikimenyetso cy'Uwambaro w'iyi Kipe, yahaye Umunyamabanga wa Leta muri Minisiteri ya Siporo mu Rwanda, Rwego Ngarambe.

Aka kuri Sitade Amahoro, yahakoreye Imyitozo ibanziriza umukino wo ku munsi w'ejo, iyi kandi yanitabiriwe na Haruna Niyonzima, Umukinnyi w'Umunyarwanda wayinyuzamo hagati y'i 2011 na 2017 ndetse n'i 2020-21.

Mu rwego rwo korohereza abazitabira uyu mukino, Kuri uyu wa Gatanu, Sitade Amahoro irafungurwa guhera ku Isaha ya saa 10:00 za mugitondo.

Ku Isaha ya saa 12:00, hazakinwa umukino uzahuza abahuza abanyuze mu makipe yombi, mbere y'uko rwambikana ku Isaha ya saa 18:00.

Kugeza ubwo twakoraga iyi nkuru, Amatike yo kureba uyu mukino, yari amaze kugurwa ku kigero cya 65%, nk'uko byatangajwe na Ngabo Roben ushinzwe Itangazamakuru muri Rayon Sports.

Amafoto