U Rwanda rwatangiye Igikombe cy'Afurika rutsindwa rya Côte d'Ivoire

Ikipe y'Igihugu y'u Rwanda y'abagabo, ntiyahiriwe n'umukino wa mbere w'Igikombe cy'Afurika wayihuje n'iya Côte d'Ivoire.

Uyu mukino waraye ukinwe mu ijoro ryakeye, warangiye u Rwanda ruwutsinzwe ku manota 78 kuri 70.

Umukino wahuje aya makipe yombi, n'uwo mu itsinda rya mbere, ibi bihugu byombi bisangiye na Repubulika ya Demokarasi ya Congo na Cape Verde.

Mbere y'iminota 7 ngo umukino urangire, u Rwanda rwakozaga imitwe y'intoki ku ntsinzi y'amateka, nk'uko byari byaraye bigendekeye Guinea ikora mu Jisho Sudani y'Epfo.

Hasigaye Iminota 6 n'Amasegonda 47, rwari ruyoboye umukino n'amanota 63 kuri 62.

Gusa, abasore b'Umutoza Cheikh Sarr ntibashoboye kwihagararaho, imbere y'Inzovu za Côte d'Ivoire.

Uduce dutatu tw'uyu mukino, twihariwe n'u Rwanda, kugeza mu ka nyuma, Côte d'Ivoire yakinnye nk'iyariye amavubi.

Intsinzi ya Côte d'Ivoire imbere y'u Rwanda, yari yo ya mbere yari ibonye mu gikombe cy'Afurika, nyuma yo gutsindwa ku mukino wa nyuma ya Tuniziya mu 2021.

Muri uyu mukino, abakinnyi ba Côte d'Ivoire barimo: Assemian Moulare, Matt Costello na Jean Philippe Dally, batsinze amanota 42.

Ku ruhande rw'u Rwanda, Ntore Habimana na Hason Devere Ward nibo bakinnyi barutsindiye amanota menshi.

Uyu mukino, wagaragaje ko abakinnyi b'u Rwanda bakwiriye kugira ibyo bakosora mbere yo guhura na Repubulika ya Demokarasi ya Congo kuri uyu wa Gatanu.

Bimwe mu byo gukosora, birimo gutakaza imipira kenshi, cyane ko muri uyu mukino, bawutakaje inshuro 26.

Uku gutakaza imipira, Côte d'Ivoire yakubyaje umusaruro, kuko yagutsinzemo amanota 23.

Côte d'Ivoire yatsinze uyu mukino, iri ku mwanya wa 31 ku Isi, mu gihe u Rwanda ari urwa 93.

Amafoto