Transfers: Abakinnyi bashobora guhindura amakipe ku munsi wa nyuma

Nyuma y'Amezi arenga abiri Isoko ryo kugura no kugurisha abakinnyi ku Mugabane w'u Burayi riremwa, kuri uyu wa Mbere rirafunga Imiryango, rizongere gufungura muri Mutarama [1] y'Umwaka utaha [2026].

Biteganyijwe ko riza gushyirwaho akadomo ku isaha ya saa 19:00 ku isaha ngengasamaha ya GMT, saa 20:00 ku isaha ya Kigali.

Mbere y'uko rifunga, THEUPDATE yarinyujijemo amaso, ibategurira inkuru igaruka ku bakinnyi bashobora guhindura amakipe bakinagamo.

Ku ikubitiro, abahanzwe amaso ni Myugariro Marc Guehi, Umunyezamu Emiliano Martinez na rutahizamu Alexander Isak.

Marc Guehi ni Myugariro w'Imyaka 25 gusa y'amavuko, usanzwe ukinira Ikipe ya Crystal Palace muri Shampiyona y'Ubwongereza.

Uyu myugariro arifuzwa ku buryo bukomeye n'Ikipe ya Liverpool, cyane ko yamushatse kuva mu Mwaka ushize, ariko ntibikunde.

Mu gihe Liverpool yakajije umurego imushaka, Crystal Palace yerekeje amaso mu Ikipe ya Brighton, isaba gutizwa myugariro, Igor Julio.

Ntagihindutse, Marc Guehi, ashobora kuza kurara abaye umukinnyi mushya wa Liverpool, n'ubwo Umutoza wa Crystal Palace, Oliver Glasner, yaburiye abayobozi ko nibaramuka bamugurishije, Ikipe izitwara nabi.

Tukiri muri Liverpool, birasa n'ibyamaze kurangira ko yibikaho, Rutahizamu w'Umunyasuwede, Alexander Isak, w'Imyaka 26 y'amavuko, wakiniraga Ikipe ya Newcastle United.

Uyu mukinnyi yashatswe na Liverpool guhera mu Kwezi kwa Kamena [6] 2025, ariko Newcastle ikomeza kwinangira.

Uko Newcastle yinangiraga, niko Isak nawe yayigereraga muri ako kebo, bihumira ku mirari, ubwo yangaga gukora imyitozo ndetse n'Imikino 3 ya Shampiyona imaze gukinwa, ntiyagira n'umwe agaragaramo.

Byitezwe ko Liverpool imutangaho Miliyoni 123 z'Amapawundi, kakaza kuba ari n'agahigo gaciwe mu Bwongereza, k'umukinnyi waguzwe amafaranga menshi.

Damián Emiliano Martínez Romero, ni Umunyezamu w'Ikipe y'Igihugu ya Argentine n'Ikipe ya Aston Villa.

Guhera mu Ijoro ryakeye, biravugwa ko igihe icyo aricyo cyose, ashobora kwerekeza mu Ikipe ya Manchester United, yamwifuje kuva Umwaka ushize.

Manchester United imaze igihe ifite ikibazo cy'Umunyezamu, cyane ko Andre Onana, Umunyezamu nimero ya mbere wayo, ashidikanywaho n'abatari bacye.

Ku Myaka 32, hari abamufata ko ashaje [Akuze], ariko ntabwo byaba ari ubwa mbere Manchester United iguze Umunyezamu uri hejuru y'Imyaka 30, kuko mu 2005 ubwo yatozwaga na Sir Alexander Chapman Ferguson, yaguze Umunyezamu w'Umuholandi, Edwin van der Sar, wari ufite Imyaka 35 imukuye mu Ikipe ya Fulham.

Edwin van der Sar yagiriye akamaro Manchester United, kuko yayifashije kwegukana Igikimbe cya UEFA Champions League mu 2008 itsinze Chelsea ku mukino wa nyuma ndetse n'ibindi bikombe bitandukanye birimo na Shampiyona y'Ubwongereza yegukanye inshuro 3 yikurikiranya.

Abandi bakinnyi bashobora guhindura amakipe barimo

• Gigio Donnarumma (PSG - Man City)
• Yoane Wissa (Brentford - Newcastle United)
• Jadon Sancho (Man Utd - Aston Villa)
• Nayef Aguerd (Westham Utd - Marseille)
• Senne Lammens (Royal Antwerp - Man Utd)
• Alexis Sánchez (Udinese - Seville)
• Antony Matheus dos Santos (Man Utd - Real Betis)
• Tyrell Malacia (Man Utd - Elche).