Shema Fabrice yiyamamarije kuyobora FERWAFA

Umuyobozi w'Ikipe ya AS Kigali, Shema Ngoga Fabrice, yatanze Kandidature yo kwiyamamariza kuyobora Ishyirahamwe ry'Umupira w'amaguru mu Rwanda, FERWAFA.

Amakuru y'uko Shema yatanze iyi Kandidature, yagiye hanze kuri uyu wa Gatanu tariki ya 18 Nyakanga [7] 2025, anyuze ku rubuga nkoranyambaga rwa X rw'Ikipe ya AS Kigali.

Amatora yo gushaka umuyobozi wa FERWAFA mushya mu Myaka 4 iri imbere, ateganyijwe tariki ya 30 Kanama [8] 2025.

Ku rubuga rwa X rw'Ikipe ya AS Kigali, banditse bagira bati:“AS Kigali inejejwe no kubatangariza ko Bwana Shema Ngoga Fabrice yatanze Kandidature k'umwanya wo kuyobora FERWAFA”.

Rikomeza rigira riti:“Shema n'abo bazakorana, baraza kugeza Kandidature yabo mu buryo bwemewe n'amategeko, muri Komisiyo ishinzwe Amatora muri FERWAFA, kuri uyu wa Gatandatu ku Isaha ya saa Sita z'Amanywa”.

Risoza rigira riti:“Tumwifurije amahirwe we n'abo bazakorana, kandi nk'Ikipe ya AS Kigali tumuri inyuma”.

Ntagihindutse, biteganyijweko Shema ashobora kuzahanganira uyu mwanya na Bwana Alphonse Munyantwali usanzwe uyobora FERWAFA, nyuma yo gusimbura Olivier Mugabo tariki ya 24 Kamena [6] 2023, ubwo yeguraga k'ubuyobozi bwa FERWAFA, ku mpamvu yasobanuye ko ari ize bwite.

Kwakira Kandidature z'abifuza kuyobora FERWAFA, byatangiye tariki ya 10 Nyakanga [7] 2025, bikaba biteganyijwe ko biza gusozwa kuri uyu wa Gatandatu tariki ya 19 Nyakanga [7] 2025.

Guhitamo abujuje ibyangombwa, bizakorwa hagati ya tariki ya 21 na 26 Nyakanga [7] 2025, mu gihe urutonde rw'abemerewe ruzatangazwa tariki ya 28 Nyakanga [7] 2025.

Uretse kuyobora Ikipe ya AS Kigali guhera mu 2018, Shema asanzwe ari umuyobozi mukuru wa Africa Medical Supplier Limited, Ikigo gitumiza Imiti ikoreshwa mu kuvura abarwayi imbere mu gihugu.

Mu 2023, yari yasezeye k'umwanya w'ubuyobozi bwa AS Kigali, gusa, yaje kongera kuwugarukaho n'ubundi muri uyu Mwaka.

Nk'umuyobozi wa AS Kigali, iyi Kipe yegukanye Ibikombe 2 by'Irushanwa ry'Igikombe cy'Amahoro, ndetse n'Ibikombe 2 by'Igikombe kiruta ibindi.