Sebwato wifuzwa na APR FC yongereye amasezerano y'Umwaka muri Mukura

Aug 28, 2025 - 18:48
Sebwato wifuzwa na APR FC yongereye amasezerano y'Umwaka muri Mukura

Nicolas Sebwato bivugwa ko yifuzwa n'Ikipe y'Ingabo z'u Rwanda, APR FC, yongereye amasezerano y'Umwaka akinira Mukura VS&L yari asanzwemo.

Uyu munyezamu mpuzamahanga w'Umugande, yavugwaga muri APR FC, nyuma y'uko amasezerano yari afitanye na Mukura VS&L yari yarangiranye n'Umwaka w'imikino w'i 2024-25.

Mu gihe amakuru amujyana muri APR FC yari akomeje kwiyongera, ku mugoroba wo kuri uyu wa Kane, Mukura VS&L yatangaje ko Sebwato yongereye amasezerano yo kuguma i Huye, ejo hashize.

Guhera mu Mwaka w'i 2021, Sebwato niwe Munyezamu nimero ya mbere w'Ikipe ya Mukura VS&L.

Mu Mwaka w'i 2023 nibwo yongereye amasezerano yo kuyigumamo indi Myaka 2, nyuma y'uko iyo yari yasinye yari ishyizweho akadomo.

Mu Mwaka ushize w'imikino [2024-25], yahembwe nk'Umunyezamu wahize abandi muri Shampiyona y'u Rwanda, ahigitse Pavelh Ndzila wakiniraga APR FC na Khadime Ndiaye wa Rayon Sports.

Amakuru yo kongera amasezerano kwa Sebwato, aje mu gihe byagugwaga ko Mukura VS&L yatangiye ibiganiro by'ibanze n'Umunyezamu w'Ikipe y'Igihugu ya Sénégal ya CHAN, Marc Philips Arona Diouf.

N'ubwo Sebwato yongereye amasezerano, ntawabura kwibaza impamvu yongereye ay'Umwaka, mu gihe yari asanzwe asinya ay'Imyaka 2.

Mu bihe bitandukanye, abakinnyi bagiye bongera amasezerano mu makipe bari basanzwemo, ariko nyuma yaho bakagurishwa.

Mu gihe Mukura VS&L yaramuka yumvikanye na Philips Arona, bishobora kuba inzira isohoka ya Sebwato.

What's Your Reaction?

Like Like 0
Dislike Dislike 0
Love Love 0
Funny Funny 0
Angry Angry 0
Sad Sad 0
Wow Wow 0