Rwanda Premier League yatangaje ingengabihe ya Shampiyona y'i 2025-26

Nyuma y'Amezi hafi atatu Sampiyona y'i 2024-25 irangiye, Shampiyona y'Umwaka w'i 2025-26 igiye gutangira.

Byatangajwe n'Ubuyobozi bwa Rwanda Premier League, nk'ubufite inshingano zo kuyitegura.

Bubinyije ku rubuga nkoranyambaga rwa X yahoze ari Twitter, bwatangaje ko izatangira tariki ya 12 z'Ukwezi gutaha kwa Nzeri [9] 2025.

Nyuma y'Amezi hafi Umunani ikinwa, izarangira tariki ya 24 z'Ukwezi kwa Gicurasi [5] y'i 2026.

Gusa, iyi ngengabihe ntabwo yagaragaje umukino uzabimburira iyindi.

Iyo itangajwe, abakunzi ba Ruhago mu Rwanda, amaso aba ahanze umukino uhuza Rayon Sports na APR FC.

Muri Shampiyona ishize, umukino ubanza uhuza aya makipe yombi, wakinwe mu Kwezi k'Ukuboza [12] 2024.

Uyu mukino wakiniwe kuri Sitade Amahoro i Remera mu Mujyi wa Kigali, wari wakiriwe na Rayon Sports, urangira amakipe yombi aguye miswi y'ubusa ku busa. Ibi niko kandi byagenze mu mukino wo kwishyura wazihuje.

Igikombe cya Shampiyona y'i 2024-25, cyegukanywe n'Ikipe ya APR FC, ikurikirwa n'iya Rayon Sports, mu gihe Muhazi United na Vision zamanutse mu kiciro cya kabiri.

Muri uyu Mwaka mushya, Ikipe ya AS Muhanga na Gicumbi FC, nizo zizaba ari nshya.

Gusa, ntabwo ari ku nshuro ya mbere zizaba zikinny iyi Shampiyona, n'ubwo zitakunze guhirwa.

Amafoto