Rwanda 1-2 Kenya: Amavubi y'abatarengeje Imyaka 17 yongeye gutsindwa muri CECAFA

Ikipe y'Igihugu y'u Rwanda y'abakinnyi batarengeje Imyaka 17, yatsinzwe n'iya Kenya mu mikino ya CECAFA iri gukinirwa uri Ethiopia.

Intsizwi y'ibitego 2-1 muri uyu mukino, yabaye iya kabiri, nyuma yo gutsindwa na Ethiopia igitego 1-0 mu mukino w'umunsi wa mbere w'iyo mu itsinda.

Uyu mukino waraye ukiniwe kuri Sitade yitiriwe Abebe Bikila yubatse i Addis Ababa, wahise ushyira akadomo ku nzozi z'u Rwanda zo gushaka itike y'Igikombe cy'Afurika cy'abatarengeje Imyaka 17 giteganyijwe mu Mwaka utaha (2026).

N'ubwo iyi tike yabuze, Amavubi y'Umutoza Sosthene Habimana, yari yagiye mu karuhuko k'igice cya mbere afite ikizere, cyane ko yari ayoboye umukino n'intsinzi y'igitego 1-0.

Gusa, iyi ntsinzi ntabwo yarambye, nyuma y'uko Nicholas Ochola wa Kenya yinjiye mu kibuga mu gice cya kabiri.

Ni mu gihe Amavubi yari yagiye mu kiruhuko cy'iminota 15 afite igitego cyatsinzwe na Oliver Nshimiyimana ku mupira yahawe na Daniel Mugunga ku munota wa 35 w'umukino.

Nyuma y'uko amakipe agarutse mu kibuga, Ochola winjiye mu kibuga asimbuye, yahise atsinda igitego cyo kwishyura ku munota wa 68 mu gihe Armstrong Omondi yatsinze icy'agashinguracumu ku munota wa 77.

Intsinzi ya Kenya yahise iyishtyira ku mwanya wa kabiri n'amanota 4 inyuma ya Ethiopia iyoboye itsinda n'amanota 6.

Imikino yo muri iri tsinda, izashyirwaho akadomo ku wa mbere tariki ya 24 Ugushyingo (11) 2025, Ethiopia ikina na Sudani y'Epfo mu gihe u Rwanda ruzisobanura na Somalia.

Amafoto