RGB yahagaritse inzego zose z'ubuyobozi bwa Rayon Sports

Urwego rw'Igihugu rw'Imiyoborere (RGB), ryongeye kwinjira mu bibazo by'Ikipe n'umuryango wa Rayon Sports, ndetse rusesa inzego zose z'ubuyobozi bwari bwaratowe n'abanyamuryango.

RGG ivuga ko ibi byakozwe hagamijwe gushaka igisubizo nyacyo cy'ibibazo bishingiye ku miyoborere byabaye ndanze muri iyi kipe.

Ntabwo ari ku nshuro ya mbere RGB yinjiye mu bibazo bya Rayon Sports, kuko no mu 2020 nabwo yabyinjiyemo, hafatwa umwanzuro wo gusesa inzego zatowe.

Mu itangazo yashyize hanze kuri uyu wa 26 Ugushyingo (11) 2025, rivuga ibijyanye n'iki cyemezo, RGB igira iti:

Hashingiwe ku Itegeko Nº56/2016 ryo ku wa 16/12/2016 rishiraho Urwego rw’Igihugu rw’Imiyoborere (RGB) rikanagena inshingano, imitwe n’imikorere yarwo, ndetse n’Itegeko Nº058/2024 ryo ku wa 20/06/2024 rigenya imiryango nyarwanda itari iya Leta, kuri uyu wa 25 Ugushyingo 2025, RGB yagiriye inama n’ubuyobozi bw’Umuryango wa Rayon Sports, hagamijwe gukemura ibibazo bibonekamo kugagara mu miyoborere, birimo ingaruka ku mikorere y’ikipe, miyoborere yayo n’umusoro wawo mu iterambere rya siporo mu Rwanda.

Nyuma yo gusuzuma byimbitse ibi bibazo, inama yafashe umwanzuro wo guhagarika inzego zose zari ziyoboye umuryango wa Rayon Sports arizo: Inama y’Ubutegetsi, Komite Nyobozi, Komite Ngenzuzi, ndetse n’Akanama gashinzwe gukemura amakimbirane.

Hashyizweho komite y’agateganyo ifite inshingano zikurikira:

• Gusuzuma no kuvugurura amategeko y’Umuryango wa Rayon Sports
• Gusesengura no kuvugurura inzego z’imiyoborere hagamijwe n’inshingano zazo
• Gukurikirana igenzura (External Audit) ry’imikorere y’umuryango
• Gusigira umuyobozi w’ubusigire bw’umuryango wa Rayon Sports mu gihe cy’inzibacyuho
• Gukurikirana ibikorwa n’imirimo yose y’umuryango mu gihe cy’amezi atatu.

Nyuma yo gusesa inzego zatowe n'abanyamuryango, RGB yashyizeho komite y'inzibacyuho yahawe ishingano zo gukurikirana ibikorwa n’imirimo yose y’umuryango wa Rayon Sports mu gihe cy’amezi atatu.

Iyi komite igizwe na: Bwana Murenzi Abdallah wahawe inshingano zo kuyikurira, Me. Jean Bosco Ubumwe, Madamu Josee Akayezu, Bwana Gakwaya Olivier na Bwana Nsabimana Batiste

Iri tangazo risoza rivuga ko, RGB yakomeje ivuga ko izakomeza gufasha Rayon Sports mu ishyirwa mu bikorwa ry’izi mpinduka hagamijwe gutuma ikora ibiruseho, binyuze mu miyoborere iboneye, bubahiriza amategeko kandi buyamiriza ibyahungabanya umuryango. Izi ngamba ni intambwe ikomeye mu kugarura ituze no gukomeza gushimangira imiyoborere myiza mu Muryango wa Rayon Sports.

• Imvano y'ibibazo biri muri Rayon Sports

Tariki ya 19 Ugushyingo (11) 2025, Abadepite mu Nteko Ishinga Amategeko y’u Rwanda babajije Ubuyobozi bw’Urwego rw’Igihugu rushinzwe Imiyoborere, RGB, amaherezo n’umuti ku bibazo biri muri Rayon Sports nyuma y’umwuka mubi ushingiye ku kutumvikana kwa bamwe mu bayobozi.

Byagarutseho ubwo RGB yagezaga Raporo y’ibikorwa by’umwaka wa 2024/2025 ku Nteko Ishinga Amategeko imitwe yombi.

Ubwumvikane buke muri Rayon Sports si bushya kuko kuva mu ntangiriro z’uyu mwaka, hakunze kumvikana ihangana ryeruye hagati y’abagize Inama y’Ubutegetsi yayo [Urwego Rukuru] ikuriwe na Muvunyi Paul na Komite Nyobozi iyobowe na Twagirayezu Thaddée.

Hakunze kugaragara kudahuza ku bijyanye n’amategeko shingiro y’Umuryango, cyane mu gusobanukirwa umuyobozi uhagarariye Rayon Sports mu buryo bw’amategeko, kudashyigikirana mu bikorwa by’ikipe, kutumvikana ku mushinga w’akanyenyeri, igurwa ry’abakinnyi mu mpeshyi no ku byemezo byerekeye umutoza Afahmia Lotfi uheruka kwirukanwa.

Ibyo byagize ingaruka ku musaruro w’iyi kipe yasoje umwaka w’imikino wa 2024/25 nta gikombe itwaye no kuba ubu nta cyizere abafana bayo bafite nyuma yo gutangira nabi uyu mwaka w’imikino wa 2025/26.

Ubwo Rayon Sports yaherukaga kugira ibibazo nk’ibi byo kudahuza mu miyoborere mu 2020, byakemuwe na RGB ku bufatanye na Minisiteri ya Siporo.