Rayon Sports yahagamwe na Gasogi, Afhamia Lofti yongera kwibazwaho

Abakunzi n'abafana b'Ikipe ya Rayon Sports, bongeye kurushaho kwibaza ku hazaza h'iyi Kipe, nyuma yo kugwa miswi na Gasogi United, mu mukino w'umunsi wa 3 wa Shampiyona y'i 2025-26.

Uyu mukino wakiniwe kuri Sitade yitiriwe Pelé i Nyamirambo mu Mujyi wa Kigali ku gicamunsi cyo kuri uyu wa 05 Ukwakira [10] 2025, warangiye amakipe yombi anganyije ibitego 2-2.

Nyuma yo kunganya, Abafana bakomeje kwibaza niba koko Afhamia Lofti ariwe mutoza ukwiriye Ikipe bihebeye, cyane ko kuri ubu, Rayon Sports ifite amanota 4 mu manota 9. 

Umusaruro w'ibitego 2-2 Abafana bafata nk'aho ari mubi, uje wiyongera ku ntsinzwi y'igitego 1-0, iyi Kipe yatsinzwe na Police FC n'ubundi hagati mu Cyumweru cya mbere cy'Ukwezi k'Ukwakira [10] 2025.

Bamwe mu bafana bavuga ko Lofti ari umutoza utajyanye n'ibyo Rayon Sports yifuza, mu gihe hari n'abavuga ko abakinnyi yaguriwe harimo umubare munini w'abatari ku rwego rwo gukinira Ikipe bihebeye.

N'ubwo yaje kwishyurwa ndetse n'igice cya mbere kikarangira yatsinzwe ibitego 2-1, Rayon Sports niyo yari yabanje gufungura amazamu, ku gitego cyatsinzwe na Gloire Tambwe ku munota wa gatanu w'umukino.

Bidatinze, Gasogi United yahise ikishyura ku munota wa 17 w'umukino gitsinzwe na Ngono Guy Herve Eloundou, mu gihe Kokoete Udo yasonzemo ku munota wa 29.

Nyuma y'uko amakipe yombi avuye kuruhuka, Rayon Sports yatanze Gasogi United kwinjira neza mu mikino, ihita inayishyura igitego cyatsinzwe na Harerimana Abdelaziz ku munota wa 52.

Impinduka zavuyemo iki gitego, zakozwe Lotfi yinjiza mu Kibuga abakinnyi batatu barimo: Mohamed Chelly, Fiston Ishimwe na Abderaziz Harerimana, basimbuye abarimo: Aimable Ntarindwa, Aziz Bassane na Tony Kitoga. 

Izi mpinduka zatije umurindi Rayon Sports ndetse ikomeza gukina yerekana ko ifite inyota yo kwegukana intsinzi, ariko Gasogi United yayicungiraga hafi.

Ku munota wa 88 w'umukino, Hakim Hamissi wa Gasogi United yatsinze igitego cyari gutanga amanota 3 kuri iyi Kipe ya Nkuliza Kakooza Charles [KNC], ariko Emmanuel Habumugisha wari Umusifuzi muri uyu mukino, avuga ko yari yaraririye [Off side].

Ni icyemezo cyateje impaka no kutavugwaho rumwe, ariko ntacyo byahinduye ku mwanzuro yari yafashe.

Umusaruro w'uyu mukino, wasize Gasogi United ku mwanya wa 4 n'amanota 5 ku rutonde rw'agateganyo rwa Shampiyona, mu gihe Rayon Sports iri ku wa 7 n'amanota 4 nk'uko twari twabigarutseho.

Nyuma y'imikino 3 imaze gukinwa, Ikipe ya Polisi y'u Rwanda, Police FC, niyo iyoboye Shampiyona n'amanota 9 ku 9, nyuma y'uko itsinze igitego 1-0 bwa Muhanga FC.

Amafoto