Rayon Sports, Kiyovu, AS Kigali na APR FC zaguwe nabi n'Umunsi wa 11 wa Shampiyona

Impera z’Icyumweru zasize ibinezaneza mu bakunzi b’Ikipe ya Polisi y’Igihugu, Police FC, mu gihe ab’Amakipe ya APR FC, Rayon Sports, Kiyovu Sports na AS Kigali baguwe nabi.

N’impera zakinwemo umunsi wa 11 wa Shampiyona y’ikiciro cya mbere mu Rwanda, watangiye ku wa kane tariki ya 11 Ukuboza (12) 2025.

Ni umunsi wabimburiwe n’umukino Rutsiro FC yatsinzemo Amagaju FC, ibitego 2-1.

Ibi bitego byatsinzwe na Kwizera Eric ku munota wa 22 na Mbusa Jeremie ku wa 52 ku ruhande rwa Rutsiro, byaje byishyura icya Iradukunda Desire w’Ikipe y’Amagaju wari wafunguye amazamu ku munota wa 8 w’umukino.

Nyuma y’uko Rutsiro yisengereye Amagaju iyasanze mu rugo kuri Sitade Kamena mu Karere ka Huye mu Ntara y’Amajyepfo, bucyeye bwaho tariki ya 12 Ukuboza (12) 2025, Ikipe ya Polisi y’Igihugu, Police FC, yatsinze Gasogi United igitego 1-0.

Muri uyu mukino wakiniwe kuri Sitade yitiriwe Pele i Nyamirambo mu Mujyi wa Kigali, amakipe yombi yatandukanyijwe n’igitego cyo ku munota wa 52 cyatsinzwe na Ani Elijah.

Ku wa Gatandatu tariki ya 13 Ukuboza (12) 2025, hakinwe imikino itatu,

Muri iyi mikino, irimo uwo Etincelles FC yatsindiye Musanze FC mu rugo ibitego 3-1, AS Muhanga igwa miswi y’u 0-0 na AS Kigali mu mukino wakiniwe kuri Sitade y’Akarere ka Muhanga, mu gihe Gorilla FC yahagamye APR FC, mu mukino w’u 0-0 wakiniwe kuri Sitade yitiriwe Pele

Ibitego byatsinzwe mu mukino Musanze FC yari yakiriyemo Etincelles FC, byinjijwe na; Robert Mukogotya ku munota wa 20 na 45, mu gihe Niyonkuru Sadjati yatsinze ku munota wa 22. Ku ruhande rwa Musanze FC, cyatsinzwe na Charles Nonso ku munota wa 81.

Uyu munsi wasojwe n’indi mikino itatu yakinwe kuri iki Cyumweru tariki ya 14 Ukuboza (12) 2025.

Ni imikino irimo uwo Mukura VS&L yatsinzemo Gicumbi FC igitego 2-0. Uyu mukino wakiniwe muri Sitade ya Kamena mu Karere ka Huye, impande zombi zatandukanyijwe n’ibitego byo ku munota wa 27 cyatsinzwe na Elie Tatou n’icyo ku wa 75 cyatsinzwe na Hakizimana Zuberi.

Kuri iki Cyumweru kandi, mu Karere ka Rubavu kuri Sitade Umuganda, Marine FC yahatsindiye Ikipe ya Kiyovu Sports igitego 1-0, cyatinzwe na Nyarugabo Moise.

Mu Karere ka Bugesera mu Mujyi wa Nyamata, Ikipe ya Rayon Sports yahahuriye n’uruva gusenya, ihatsindirwa na Bugesera FC ibitego 2-1.

Ni umukino wari uhanzwe amaso by’umwihariko abakunzi ba APR FC bari bategereje kureba uko mukeba yitwara.

Ibitego by’Ikipe ya Bugesera, byatsinzwe na Rugangazi Prosper ku munota wa 22 na Byishimo Valua ku munota wa 78.

Ku ruhande rw’Ikipe ya Rayon Sports, inshundura zanyeganyejwe na Habimana Yves ku munota wa 45+1.

Uretse imikino y’umunsi wa 11, hanakinwe uw’ikirarane, Al Merrikh SC yo muri Sudani yatsinzemo Amagaju FC igitego 1-0 cyatsinzwe na Bashir Bangoura ku munota wa 5.