Patrice Neveu yagizwe Umutoza w'Ikipe y'Igihugu

Ishyirahamwe ry'umupira w'amaguru mu gihugu cya Togo (FTF), ryatangaje ko Patrice Neveu yahawe inshingano zo gutoza Ikipe y'Igihugu izwi nka “Hawks” cyangwa se “Les Éperviers”.

Neveu yemejwe nyuma y'Ibyumweru by'ijonjora ryo guhitamo umutoza ukwiriye, mu bakandida basaga amagana bari bifuje gutoza iki gihugu.

Ku myaka 72 y'amavuko, uyu mutoza mpuzamahanga w'Umufaransa, yitezweho kongera gusubiza Togo ku ruhando rw'Ibihugu byitabira Igikombe cy'Afurika nk'uko byahoze.

Nyuma yo kumuhitamo, Ishyirahamwe rya Ruhago muri Togo, ryagize riti:“Ubunararibonye bwe muri Ruhago ya Afurika, twabushingiyeho mu bandi bose bari basabye gutoza Ikipe y'Igihugu cyacu. Twizeye ko ubunararibonye afite buzageza Ikipe yacu ku byiza tuyifuriza ndetse no kubona intsinzi”.

Byitezwe ko mu minsi iri imbere, Neveu, azagera i Lomé ku Murwa mukuru wa Togo, gushyira umukono ku masezerano.

Uretse Togo, Patrice Neveu yatoje amakipe atandukanye arimo: Vendée Fontenay Foot, Angoulême CFC, Ikipe y’Igihugu ya Niger, CO Médenine, Ikipe y’Igihugu ya Guinea, Ismaily, Ikipe y’Igihugu ya Repubulika ye Demokarasi ya Congo (DR Congo), Smouha, Ikipe y’Igihugu ya Mauritania, Ikipe y’Igihugu ya Haiti, Ikipe y’Igihugu y’Ibirwa bya Laos, Horoya AC ndetse n’Ikipe y’Igihugu ya Gabon yaherukagamo mu 2023.

Urutonde ngaruka kwezi rw'Impuzamashyirahamwe ya Ruhago ku Isi, FIFA, rugaragaza ko Igihugu cya Togo kiri ku mwanya wa 34 muri Afurika ndetse n'uw'i 124 ku Isi.