Mohamed Salah yahembwe nk'uwahize abandi muri Premier League mu 2024-25

Umukinnyi mpuzamanga w'Ikipe y'igihugu ya Misiri n'Ikipe ya Liverpool, Mohamed Salah, yaraye ahembwe nk'uwahize abandi mu Mwaka w'Imikino w'i 2024-25 muri Shampiyona y'Ubwongereza, izwi nka English Premier League.

Iki gihembo cyamugize umukinnyi wakoze amateka yo kucyegukana inshuro eshatu yikurikiranya.

Abandi bacyegukanye inshuro 2 barimo; Cristiano Ronaldo wakiniraga Manchester United, Thierry Henry [Arsenal] na Gareth Bale [Tottenham Hotspur].

Salah yaherukaga kwegukana iki gihembo mu mwaka w'imikino w'i 2017-18 n'uw'i 2021-22.

Yegukanye iki gihembo nyuma yo gutsinda ibitego 29 muri Shampiyona, byafashije Liverpool kwegukana Igikombe cya Shampiyona ku nshuro ya 20.

Icy'uyu Mwaka, yacyegukanye ahize abarimo; Alexis Mac Allister bakinana muri Liverpool,  Cole Palmer [Chelsea], Bruno Fernandes [Manchester United], Declan Rice [Arsenal] na Alexander Isak wa Newcastle United.

Mu gihe Salah yegukanaga iki gihembo, Morgan Rogers w'Ikipe ya Aston Villa, nawe yacyegukanye mu bakinnyi bakiri bato.

Nicyo gihembo cya mbere mu bakiri bato umukinnyi wa Aston Villa yegukanye, kuva mu 2010 ubwo cyegukanwaga na James Milner.

Rogers yegukanye iki gihembo ahize abandi bakinnyi barimo; Liam Delap wakiniraga Ipswich kuri ubu akaba ari muri Chelsea, Myles Lewis-Skelly na Ethan Nwaneri [Arsenal], Milos Kerkez wakiniraga Bournemouth kuri ubu akaba ari muri Liverpool, na  Dean Huijsen wakiniraga Bournemouth, ariko werekeje muri Real Madrid.

Ku Myaka 33 y'amavuko, Mohamed Salah amaze gutsinda ibitego 187 muri Shampiyona y'Ubwongereza.

Ibi bitego byahise bimugira umukinnyi wa 4 umaze gutsinda byinshi muri iyi Shampiyona, ibitego anganya Andy Cole wakiniye amakipe ya Newcastle United na Manchester United mu Myaka yo ha mbere.

Iki gihembo kivuze byinshi kuri Salah, kuko ari mu bakinnyi 7 bamaze kucyegukana inshuro 2 kuzamura.

Aba bakinnyi barimo: Thierry Henry [2003 & 2004], Ronaldo [2007 & 2008], Gareth Bale [2011 & 2013], Kevin De Bruyne [2020 & 2021], Alan Shearer [1995 & 1997] na Mark Hughes [1989 & 1991].

Amafoto