Kylian Mbappé yujuje ibitego 400 ku myaka 26 gusa y'amavuko

Rutahizamu w'Ikipe y'Igihugu y'Ubufaransa, Kylian Mbappé, yaraye akoze amateka yo kuzuza Ibitego 400 kuva yatangira guconga ruhago.

Uyu mukinnyi mpuzamahanga w'Ubufaransa usanzwe ufite n'inkomoko mu gihugu cya Kameroni, ibi bitego yabyujurije mu mukino Ubufaransa bwaraye bunyagiyemo Ukraine ibitego 4-0.

Uyu mukino wari uwo gushaka itike y'Igikombe cy'Isi kizakinwa muri USA-Canada na Mexique mu mpeshyi y'Umwaka utaha.

Mbappé usanzwe ukinira Ikipe ya Real Madrid yo mu gihugu cya Esipanye, avuga ko intego ari ukuzatsinda ibitego 1000.

Mu mukino waraye ubahurije na Ukraine kuri Sidate Parc des Princes, yagiye kuwukina afite ibitego 388.

Igitego cya 399 yagitsinze ku munota wa 55 mu gihe icya 400 yagitsinze ku wa 88.

Muri ibi bitego 400, igitego cy'i 100 n'icya 300 yabitsinze yambaye umwambaro w'ikipe y'Igihugu.

Igitego cy'i 100 yagitsinze mu kwezi kwa Kamena (6) mu 2019 mu mukino wahuje Ubufaransa na Andorra, mu gihe icya 300 yagitsinze mu Ugushyingo (11) ko mu 2023, mu mukino wahuje Ubufaransa na Gibraltar.

Ku rwego rw'Ikipe y'Igihgu y'Ubufaransa, aracyabura ibitego 2 gusa kugira ngo ahinduke umukinnyi umaze kuyitsindira ibitego byinshi, kuko amaze gutsinda 55, arushwa 2 gusa na Olivier Giroud.

Nta gihindutse aka gahigo ashobora kugakuraho kuri iki Cyumweru, mu mukino uzahuza Ubufaransa na Azerbaijan. Uyu mukino, uzakinirwa i Baku.

Mu bitego 400 amaze gutsinda muri rusange, 345 yabitsindiye amakipe atandukanye yanyunzemo.

Muri byo, 27 yabitsindiye Ikipe ya Monaco, 256 abitsindira Ikipe ya Paris Saint-Germain, mu gihe 62 amaze kubitsindira Ikipe ya Real Madrid ari gukinamo mu Mwaka wa kabiri.

Muri Monaco na Paris Saint-Germain yahakinnye imikino 191 ya Shampiyona.

Amaze kandi gukina imikino 60 ya UEFA Champions League, 44 ya Shampiyona ya Esipanye na 37 ya Coupe de France.

Kuva yatangira gukinira Ubufaransa, ntabwo burasiba inshuro n'imwe kujya mu mikino y'Igikombe cy'Igikombe cy'Isi.

Itike bwaraye bubonye, yabaye iya 8 yikurikiranya, nyuma yo kudakina igikombe cy'Isi cyo mu 1990 n'icyo mu 1994.

Muri izi nshuro 8 zikurikiranya, Ubufaransa bumaze kwegukana iki gikombe inshuro 2 (1998) no mu 2018.

Mu 1998, bwari bwakiriye iyi mikino, butsinda Brazil ku mukino wa nyuma mu gihe 2018, bwegukanye igikombe butsinze Croatia mu mikino yakiniwe mu Burusiya.