Iteramakofe: Ibihangange muri Afurika bitegerejwe muri “Kigali Fight Night”

Abakinnyi bahiga abandi mu mukino w'Iteramakofe bavuye mu bihugu 7 byo ku Mugabane w'Afurika, bategerejwe muri “Kigali Fight Night”.

Kigali Fight Night ni irushanwa ry'umukino w'Iteramakofe, rizakinirwa ku nshuro ya mbere mu Mujyi wa Kigali.

Riteganyijwe tariki ya 08 Ugushyingo (11) 2025, rikazakinirwa kuri Zaria Court. 

Rigiye gukinwa rikurikira PFL (Professional Fighters League ), irushanwa ry'umukino njyarugamba wa MMA (Mixed Martial Arts), ryabiciye bigacika mu byumweru bibiri bishize, ubwo ryakinirwaga muri BK-Arena.

Kigali Fight Night yateguwe na Silver Black Sport ifatanyije n'Ishyirahamwe ry'umukino w'Iteramakofe mu Rwanda.

Izitabirwa n'abakinnyi kabuhariwe bavuye mu bihugu birimo “Nigeria, Tanzania, Cameroon, Gabon, Kenya, DR Congo n'u Rwanda”.

Abakinnyi 7 babigize umwuga na 5 bari muri uru rugendo, bazaba bahanzwe amaso n'abakunzi b'uyu mukino, bakomeje kwiyongera mu Rwanda uko bwije n'uko bucyeye.

Umurwano (Umukino) uzaba uhanzwe amaso muri Kigali Fight Night, uzahuza Umunya-Cameroon “Tamba Merlin”, uzesurana na “Jonathan Katompa” wo muri Repubulika ya Demokarasi ya Congo.

Aba bakinnyi bombi, bafatwe nk'abari ku ruhembe rw'uyu mukino by'umwihariko muri Afurika y'i Burasirazuba n'iyo hagati.

Indi mirwano yitezwe, irimo uzahaza “Jerry Katamba Kabango” wo muri Repubulika ya Demokarasi ya Congo, uzahangana na “Ally Mwerangi” wo mu gihugu cya Tanzaniya.

“Kassa Ningbo Odilon Hans” wo mu gihugu cya Gabon, azakina na “Alphonce Joseph Masumbuko” wo muri Tanzaniya.

Umunya-Nigeria “David Segun Akintola” azisobanura na “Aziz Waziri Uliza” wo muri Tanzaniya, mu gihe Precious Iyabo Anine nawe wo muri Nigeria, azahura na “Flora Paulo Machela”, mu kiciro cy'abagore.

Muri iki kiciro cy'abagore, hateganyijwe kandi umurwano uzahuza “Daniella Muleketsi Nsii” wo muri Repubulika ya Demokarasi ya Congo na “Charity Mukami Mutwiri” wo mu gihugu cya Kenya.

Ku ruhande rw'u Rwanda, “Frank Kazungu”, umwe mu Banyarwanda bahagaze neza, azisobanura na “Mavoungou Mboko Mohamed” wo mu gihugu cya Gabon.