Cheikh Sarr yasezeye akazi ko gutoza Ikipe y'Igihugu ya Basketball

Cheikh Sarr, yasezeye akazi ko gutoza Ikipe y'Igihugu ya Basketball mu bagabo n'abagore. 

Yari yatangiye aka kazi mu 2021, agasimbuyeho Umunyaseribiya Vladimir Bosnjak, nawe wari wagasezeyeho mu 2020.

Uyu mugabo w'Umunyasenegal w'Imyaka 57 y'amavuko, yagasezeye nyuma y'Imyaka 4 yari akamazemo.

Aya makuru yemejwe n'Ishyirahamwe ry'Umukino wa Basketball mu Rwanda, FERWABA, rihamya ko impande zombi zemeranyijwe gutandukana mu bwumvikane.

Sarr yatangiye gutoza Ikipe y'Igihugu ya Basketball mu bagabo n'abagore, nyuma yo gutoza Ikipe y'Igihugu ya Senegal.

Mu Mezi 8 ashize, yari yasinye amasezerano y'Imyaka 2, yari kuzamugeza muri Werurwe y'i 2027.

Nk'Umutoza w'Ikipe y'Igihugu, yafashije u Rwanda kwegukana Umudali w'Umwanya wa gatatu [Bronze], mu mikino y'Igikombe cy'Afurika mu 2023.

Muri uyu Mwaka kandi, yafashije Ikipe y'Igihugu y'u Rwanda y'abagore, guhatanira umukino w'umwanya wa gatatu, umukino yatsinzwemo na Mali amanota 89 kuri 51.

Niwe wari Umutoza kandi w'Ikipe y'Igihugu y'u Rwanda, yitabiriye ku nshuro ya mbere amajonjora y'ibanze yo guhatanira Itike y'Igikombe cy'Isi.

Gusa, ntabwo yahiriwe muri iyi mikino yo mu kiciro cy'abagore, kuko yayitsinzwemo n'Ikipe y'Igihugu y'Ubwongereza n'iya Senegal. Iyi mikino yari iyo mu itsinda rya kane, yakiniwe i Kigali.

Nyuma yo gushimirwa umusaruro yahesheje u Rwanda mu 2023 ndetse ukanamufasha kongererwa amasezerano, ntabwo yahiriwe n'uyu Mwaka w'i 2025, ndetse atangira kwibazwaho.

Hashingiwe ku musaruro w'Ikipe y'Igihugu y'abagore n'abagabo yitabiriye imikino ya nyuma y'Igikombe cy'Afurika, igatsindwa uruhenu [Idakozemo].

Imikino y'Igikombe cy'Afurika mu Bagabo yakiniwe muri Angola, mu gihe iy'abagore yakiniwe muri Côte d'Ivoire.

N'ubwo atandukanye n'u Rwanda, Sarr afite ibigwi n'ibirindiro muri Senegal, cyane ko ariwe mutoza wa mbere wayifashije gukora amateka yo kugera mu ijonjora rya nyuma ry'imikino y'Igikombe cy'Isi cyo mu 2014.