CECAFA Kagame Cup 2025: APR FC yageze muri ½ idatsinzwe umukino n'umwe

Ikipe y'Ingabo z'u Rwanda, APR FC yakatishije itike yo gukina imikino ya ½ cya CECAFA Kagame Cup idatsinzwe umukino n'umwe, nyuma y'uko yaraye inganyije igitego 1-1 na KMC.

Uyu mukino wahuje aya makipe yombi, wari uwa gatatu mu itsinda rya kabiri, wahise utuma APR FC irisoza ariyo iriyoboye.

Myugariro wa APR FC, Clement Niyigena, niwe wafunguye amazamu muri uyu mukino ku munota wa 39, igitego cyaje guhita kishyurwa na Erick Edson wa KMC ku munota 40.

Mu mikino 3 APR FC yakinnye, yayitsinzemo ibitego 7, inganya n'ikipe ya KMC.

Gusa, APR FC iyoboye iri tsinda ibikesha ibitego kuba itarinjijwe ibitego byinshi.

Umwaka ushize, iri rushanwa ryegukanywe n'Ikipe ya Red Arrows yo mu gihugu cya Zambiya, itsinze APR FC yo mu Rwanda, mu mukino wa nyuma wakiniwe kuri KMC Stadium.

APR FC imaze kwegukana iri rushanwa inshuro eshatu [2004, 2007 na 2010].

Mu Mwaka w'i 1996 n'uw'i 2000, yatsindiwe ku mukino wa nyuma.

Mu 1996 yatsinzwe na Simba SC yo muri Tanzaniya, mu gihe mu 2000 yatsinzwe na Tusker FC yo muri Kenya.

CECAFA Kagame Cup y'Umwaka ushize, yakinwe hagati ya tariki ya 09 n'iya 21 Nyakanga [7] 2024.

CECAFA Kagame Cup, iterwa inkunga na Perezida Kagame Paul w'u Rwanda, aho buri Mwaka atanga Ibihumbi 60 by'Amadorali ya Leta zunze Ubumwe z'Amerika.

Ikipe itwaye Igikombe ihabwa Ibihumbi 30$, iya kabiri igahabwa Ibihumbi 20$, mu gihe iya gatatu itwara Ibihumbi 10$.

Amafoto