CAF yemereye makipe yo muri Sudani yasabye gukina Shampiyona y'u Rwanda

Impuzamashyirahamwe y'umupira w'amaguru muri Afurika CAF, yatanze uburenganzira ntakuka ku makipe abiri yo muri Sudani, yari amaze igihe ategereje kwemererwa gukina muri Shampiyona y'u Rwanda.

Al-Merreikh na Al-Hilal zo muri Sudani, zari zimaze hafi Ibyumweru bibiri i Kigali, nyuma yo kwemererwa n'Ishyirahamwe rya ruhago mu Rwanda, FERWAFA na Rwanda Premier League gukina Shampiyona y'u Rwanda, ariko nta burenganzira bwa CAF bari bafite.

Amakuru yo kwemerera Al-Merreikh na Al-Hilal gukina muri Shampiyona y'u Rwanda, yahamijwe na FERWAFA kuri uyu wa 19 Ugushyingo binyuze ku mbuga nkoranyambaga.

Bivuze ko aya makipe agiye guhita asanga andi 16 yari asanzwe akina Shampiyona y'ikiciro cya mbere, yose hamwe akaba 18.

Ukwemererwa kwazo kuje mu gihe Shampiyona igeze ku munsi wa 7 w'imikino ibanza.

Al-Merreikh na Al-Hilal zasabye gukinirwa mu Rwanda nyuma y'uko umwaka ushize zakinnye muri Shampiyona yo muri Morutaniya, yanegukanwe na Al-Hilal.

Ni mu gihe muri Sudani aho zisanzwe zibarizwa, hashize Imyaka hafi itatu hari Intambara ibica bigacika, ndetse ikaba yarasubitse hafi ibikorwa byose by'imikino.

Biteganyijwe ko aya makipe ahita atangira gukina muri Shampiyona, ndetse ntagihindutse ashobora no gukina umunsi wa 8, uteganyijwe guhera kuri uyu wa gatanu.

Abakunzi b'umupira w'amaguru bakunze kuvuga ko mu Rwanda haba amakipe abiri gusa (APR FC na Rayon Sports), ariyo akunze gusimburana ku bikombe bikinirwa imbere mu gihugu, ibi bikaba biyabeshya ko akomeye, nyamara yagera ku ruhando mpuzamahanga, agasezererwa atarenze umutaru.

Bityo, aya makipe yo muri Sudani, yitezweho kuzaba igipimo nyacyo, cyane ko ku kijyanye n'amikoro atajenjetse.