CAF Champions League: APR FC yasezerewe nyuma yo kunyagirwa na Pyramids

Ikipe y'Ingabo z'u Rwanda, APR FC, ntiyashoboye kurenga umutari mu mikino ya CAF Champions League, nyuma yo kunyagirwa na Pyramids FC mu mukino wo kwishyura w'iy'ijonjora ry'ibanze.

Uyu mukino wakiniwe kuri Sitade yitiriwe tariki 30 Kamena, i Cairo mu Misiri, ku mugoroba wo kuri uyu wa 05 Ukwakira [10] 2025, warangiye APR FC inyagiwe ibitego 3-0, byaje bisanga 2-0 yatsindiwe i Kigali tariki ya 01 Ukwakira [10] 2025.

Nyuma y'imikino yombi, bivuze ko APR FC yasezerewe itsinzwe ibitego 5-0.

Muri uyu mukino, Mustafa Ziko yafunguye amazamu ku munota wa 43 w'umukino, amakipe yombi ajya mu karuhuko k'iminota 15, Pyramids FC iwuyoboye.

Amakipe agarutse mu kibuga gukina iminota 45 y'igice cya kabiri, yafatwaga nk'umusozi wo kurira ku ruhande rwa APR FC, Ahmed Atef wa Pyramids yahise atsinda igitego cya kabiri ku munota wa 60, mu gihe Mohamed Hamdi yatsize icy'agashinguracumu.

Nyuma yo kwikura mu ijinjora ry'ibanze, Pyramids FC izacakirana na Ethiopia Insurance mu ijinjora rya kabiri, rizanatanga itike yo kujya mu mikino y'amatsinda.

Ethiopia Insurance yabonye itike yo kuzacakirana na Pyramids FC, isezereye Mlandege FC yo muri Zanzibar, ku giteranyo cy'ibitego 4-3 mu mikino yombi.

N'ubwo uyu mukino utari woroshye ku ruhande rwa APR FC, cyane ko inshuro yaherukaga i Cairo yahatsindiwe, yagiye mu Misiri idafite rutahizamu wayo Djibril Ouattara na Gilbert Mugisha wari ufite Umuhango wo gusaba no gukwa, Josephine Mpinganzima.

Bombi baje biyongera kuri Mamadou Sy na Dauda Yussif Seidu, byavuzwe ko bakuwe mu bakinnyi bakinnye uyu mukino, ku mpamvu ziswe iz'imyitwarire idahitwe bagaragaje, n'ubwo hatavuzwe iyo ariyo.

Muri iyi Myaka itatu [3] ishize, APR FC ntizibagirwa Ikipe ya Pyramids FC, kuko mu mikino itandatu [6] izi Kipe zombi zihuye mu mikino ya CAF Champions League, Pyramids FC yegukanyemo intsinzi enye [4], mu gihe amakipe yombi yaguye miswi mu mikino ibiri [2].

Nyuma yo gusezerera APR FC, ntagihindutse, Pyramids FC izakomeza urugendo rwo kwisubiza Igikombe cya CAF Champions League, yegukanye Umwaka ushize, itsinze Ikipe ya Mamelodi Sundowns yo muri Afurika y'epfo.

N'ubwo Umupira w'Amaguru ugira ibyawo, biragoye kwemeza ko Insurance of Ethiopia yakuramo Pyramids FC, ikayibuza kujya mu mikino y'amatsinda.

Mu gihe Pyramids FC yishimira kujya mu ijonjora rya kabiri, APR FC itegerejwe i Kigali, gukomeza imikino ya Shampiyona y'i 2025-26 ndetse n'imikino y'Igikombe cy'Amahoro.

Amafoto