Basketball: Côte d'Ivoire na Misiri begukanye Igikombe cy'Afurika mu Ngimbi n'Abangavu (Amafoto)

Ikipe y'Igihugu ya Côte d’Ivoire n'iya Misiri, baraye begukanye Igikombe cy'Afurika mu Ngimbi n'Abangavu mu mikino yakinirwaga i Kigali.

Ku mukino wa nyuma mu Ngimbi, Côte d’Ivoire yatsinze Kameroni amanota 62-49, mu gihe mu Bangavu, Misiri yatsinze Côte d’Ivoire, amanota 66-54.

Umwanya wa gatatu muri ibi byiciro byombi, wegukanywe n'Igihugu cya Mali.

Iyi mikino yahuzaba Abahungu n'Abakobwa batarengeje Imyaka 16, yari imaze hagi Ibyumweru bibiri ikinirwa mu Mujyi wa Kigali.

Nyuma yo kwegukana ibi Bikombe, Côte d’Ivoire na Misiri bahise banakatisha itike yo kuzagararira Umugabane w'Afurika mu mikino y'Igikombe cy'Isi cy'abatarengeje Imyaka 17 izabera muri Turukiya mu Mwaka utaha [2026].

Gusa, bazaherekezwa na Kameroni mu Ngimbi na Côte d’Ivoire mu Bangavu.

Umukino wahuje Misiri na Côte d’Ivoire ntabwo wari woroshye, kuko igice cya mbere cyawo cyarangiye amakipe yombi aguye miswi y'amanota 29-29.

Nyuma y'uko amakipe yombi avuye mu karuhuko k'Imonta 15, Misiri yagarutse yerekana ko yumvise neza ibyo yasabwe n'Abatoza, ihita yegukana agace ka gatatu igatsinzemo amanota 24 ku 08 ya Côte d’Ivoire.

Joudi Elsayed yagoye Ikipe ya Côte d’Ivoire, kuko muri aka gace, yatsinzemo amanota 10, mu gihe mu ka kane yatsinzemo 5, ndetse anakora Rebounds 7 mu mukino wose.

Mu gihe Joudi Elsayed yari amereye nabi Côte d’Ivoire, Jane Mary Diomande nawe ntabwo yari yoroheye Misiri muri uyu mukino, cyane ko yari afite ubuhanga bwihariye mu gutsinda amanota 3.

Muri uyu mukino, Misiri yari ifite abakinnyi 3 babonanaga neza, Fatma Abdalla, Leila Eissa na Elsayed, ibi bakaba babigaragaje batanga imipira 12 yabyaye amanota muri 15 ikipe yose yatanze.

Côte d’Ivoire yatakaje Imipira 28 muri uyu mukino, iyi ikaba yabyajwe umusaruro na Misiri, kuko yayitsinzemo amanota 26.

Ni ku nshuro ya mbere Côte d’Ivoire yari igeze ku mukino wa nyuma muri iki kiciro cy'abatarengeje Imyaka 16, mu gihe Misiri, besuranaga ihafite ubunararibonye.

Iki gikombe Misiri yegukanye, nicyo cya mbere itwaye, nyuma yo gutsindirwa ku mukino wa nyuma inshuro zitari nke n'Ikipe y'Igihugu ya Mali yari ifite iri rushanwa kuva ryatangira gukinwa mu 2009.

Mu kiciro cy'Ingimbi, Côte d’Ivoire yari ishyigikiwe na Bashiki babo bari bamaze gutsindwa na Misiri ku mukino wa nyuma Bangavu, yeretse Kameroni ko amakipe yombi atari ku rwego rumwe.

N'ubwo Kameroni yari yatangiye yerekana ibimenyetso byo kuza gutanga akazi gakomeye muri uyu mukino, Côte d’Ivoire yaje kuyigaranzura, by'umwihariko mu gace ka gatatu, binyuze mu gukinana neza kw'abakinnyi barimo; Buoyed, Jean-Philippe Oka na  Irené Raphael Ouédraogo.

Ugukinana neza kwabo, kwafashije Côte d’Ivoire kwegukana Igikombe cyayo cay mbere mu batarengeje Imyaka 16.

Muri uyu mukino, Nolan Ngangmeni wa Kameroni na Omar Mangassouba wa  Côte d’Ivoire, berekanye urwego rwo hejuru.

Jean-Philippe Oka yatsinze amanota 18, akora Rebounds 6, atanga Imipira 2 yavuyemo amanota, amambura abakinnyi ba Kemeroni Imipira 5.

Uyu musaruro, ukaba wamugize umukinnyi wahize wahize abandi muri iri Rushanwa [MVP].

Iyi mikino yakurikiwe n'Umuyobozi w'Impuzamashyirahamwe y'umukino wa Basketball muri Afurika, Anibal Manave, Umunyamabanga wa Leta muri Minisiteri ya Siporo, Rwego Ngarambe, Umuyobozi w'Ishyirahamwe rya Basketball mu Rwanda, Mugwiza Désiré na Pascale Mugwaneza, Visi Perezida wa Ferwaba usanzwe ari no mu nama y'ubuyobozi y'Ishyirahamwe ry'Umukino wa Basketball ku Isi, FIBA.

Amafoto