ARPST yatangaje ingengabihe y’amarushanwa y’Umunsi mpuzamahanga w’Umurimo

Ishyirahamwe ry’imikino ihuza Abakozi mu Rwanda (ARPST), ryatangaje itariki y’itangira ry’imikino yo kwizihiza umunsi mpuzamahanga w’umurimo wizihizwa buri tariki ya 01 Gicurasi (5) uko umwaka utashye.

Muri uyu mwaka w’i 2026, uyu munsi uzihizwa ari ku wa Gatanu.

Iri rushanwa, ritegurwa ku bufatanye na Minisiteri y’abakozi ba Leta n’Umurimo (MIFOTRA) n’abandi bafatanyabikorwa.

Amakipe azitabira iyi mikino, agabanyijwe mu byiciro bibiri, Category ya mbere (A) n’iya kabiri (B).

Imikino izakinwa, irimo umupira w’amaguru, ‘Volleyball, Basketball, Igisoro, Tennis, Koga’ ndetse y’iyindi, yose igakinwa n'amakipe yo mu kiciro cy’abagore n’abagabo.

Kuri uyu wa Gatanu tariki ya 13 Merurwe (3) 2026, iyi mikino irabimburirwa n’uzahuza Ibitaro bya Kaminuza bya Butare (CHUB) ndetse na Kaminuza y’u Rwanda ishami rya Huye (UR-Huye) mu mukino wa Basketball mu kiciro cy’abagore muri Category A.

Uyu mukino, uzakinirwa muri Gymnasium ya Kaminuza y’u Rwanda ishami rya Huye.

Uretse uyu mukino, hateganyijwe imikino ya Volleyball, irimo uzahuza Ikigo cy’Igihugu gishinzwe Amazi isuku n’isukura (WASAC) ndetse n’Ikigo cy’Igihugu gishinzwe abanjira n’abasohoka (DGIE).

Uyu mukino uzakinirwa muri Cercle Sportif de Kigali (CSK), mu gihe Ikigo cy’Igihugu gishinzwe abanjira n’abasohoka (DGIE) kizakina na CCI mu mukino wa Basketball uzakinirwa muri Ste Famille.

Mu mupira w’amaguru, Ikipe y’Ikigo cy’Igihugu gishinzwe abanjira n’abasohoka (DGIE), izacakira n’Ikigo cy’Igihugu gishinzwe Ingufu (REG), mu mukino uzakinirwa kuri Sitade ya Bugesera.

Muri iki kiciro kandi, Ikipe y’Ikigo cy’Igihugu gishinzwe Ibarurishamibare (NISR), izaba ihanganye n’Ikipe ya Minisiteri y’Urubyiruko n’Ubuhanzi (MOYA), mu mukino uzakinirwa kuri Sitade ya Kamonyi.

Ikipe y’Ikigo cy’Igihugu gishinzwe Ubuzima (RBC), izakira iy’Ikigo cy’Igihugu gishinzwe Ubuhinzi n’Ubuvuzi bw’Amatungo (RAB), mu mukino uzakinirwa kuri Sitade ya Kaminuza y’Imyuga n’Ubumenyingiro ya Kigali (RP-Kigali).

Mu yindi mikino, muri Volleyball, Ikipe ya Minisiteri ya Siporo (MINISPORTS) izakina n’iya Minisiteri y’Ikoranabuhanga (MINICT), Ikipe y’Ikigo cy’Igihugu gishinzwe gucunga Ibibuga by’Indege n’ibikorwa bijyanye no kuyobora Indege mu Kirere (RAC) izakina n’Ikipe y’Ikigega Cyihariye cy’Ingoboka (SGF), Ibitaro bya Kaminuza bya Butare (CHUB) bizakina n’Ikipe y’Ikigo cy’Igihugu gishinzwe Iterambere ry’Ubwikorezi (RTDA), mu gihe Ikipe y’Ikigo cy’Igihugu gishinzwe Imisoro n’Amahoro (RRA) izakina n’Ikipe y’Ikigo cy’Igihugu Gishinzwe Ubutaka (NLA).

Mu mpira w’amaguru mu makipe yo muri Category ya mbere (A) mu bagabo, Ikipe y’ Ikigo cy’Igihugu gishinzwe Iterambere (RDB) izakira Ikipe ya Minisiteri y’Ibikorwaremezo (MININFRA), Ikipe y’Ikigo cy’Igihugu gishinzwe gucunga Ibibuga by’Indege n’ibikorwa bijyanye no kuyobora Indege mu Kirere (RAC) izakina n’Ikipe y’Ikigo cy’Igihugu gishinzwe Imisoro n’Amahoro (RRA), Ikipe y’Ikigo cy’Igihugu gishinzwe Iterambere ry’Ubwikorezi (RTDA) izakira Ikipe y’Ikigo cy’Igihugu gishinzwe Ingufu (REG).

Ikipe y’Ikigo cy’Igihugu gishinzwe Ikoranabuhanga mu Itumanaho n’Isakazabumenyi (RISA) izisobanura n’Ikipe y’Ikigo gishinzwe Mine, Peteroli na Gazi mu Rwanda (RMB), mu igihe Ikipe y’Ikigo cy’Igihugu gishinzwe Ubuzima (RBC) izacakirana na RICA.

Mu mukino wa Basketball muri Category ya mbere (A), Ikipe y’Ikigo cy’Igihugu gishinzwe Imisoro n’Amahoro (RRA) izakira Ikipe y’Ikigo cy’Inzobere mu by'Ubwubatsi (GASABO 3D), Ikipe y’Ikigo cy’Igihugu gishinzwe Kugenzura Ibiribwa n’Imiti (FDA) izakina n’Ikipe y’Ikigo cy’Igihugu gishinzwe Iterambere ry’Ubwikorezi (RTDA), Ikipe ya Minisiteri ya Siporo (MINISPORTS) izakina n’Ikipe y’Ikigo cy’Igihugu gishinzwe Iterambere (RDB), mu gihe Ikipe y’Ikigo cy’Igihugu gishinzwe Amazi, Isuku n’Isukura (WASAC) izakina n’Ikipe y’Ikigo cy’Igihugu gishinzwe gucunga Ibibuga by’Indege n’ibikorwa bijyanye no kuyobora Indege mu Kirere (RAC).

Uboyobozi bwa ARPST, buvuga ko iyi mikino igamije guhuza abakozi bo mu Bigo bitandukanye ndetse na za Minisiteri, hagamijwe kubafasha gusabana ndetse no gukora Siporo.

Umwaka ushize, Amakipe y’Ikigo cy’Igihugu cy’Ubuzima (RBC) ndetse n’ay’Ikigo cy’Igihugu gishinzwe abanjira n’abasohoka (DGIE), ari muyihariye ibikombe.

Umunsi w’Umurimo mu Rwanda ni umunsi wizihizwa buri mwaka ku itariki ya 1 Gicurasi (5), ndetse uba ari ikiruhuko rusange ku rwego rw’Igihugu.

Washyizweho hagamijwe guha agaciro abakozi n’uruhare rwabo mu guteza imbere Igihugu.

Abakozi bo mu nzego zitandukanye haba mu za Leta, izigenga cyangwa imiryango itari iya Leta, bahabwa umwanya wo kuzirikana agaciro k’umurimo n’uburenganzira bw’umukozi.