APR FC yashyizwe mu itsinda rya kabiri muri CECAFA Kagame Cup 2025

Ikipe y'Ingabo z'u Rwanda, APR FC, yamenye itsinda iherereyemo mu Mikino ya CECAFA Kagame Cup yo muri uyu Mwaka w'i 2025.

Iyi mikino iteganyije kubera i Dar es Salaam ku murwa mukuru w'Ubukungu w'Igihugu cya Tanzaniya, hagai ya tariki ya 02 kugeza ku ya 15 z'Ukwezi gutaha kwa Nzeri [9] 2025.

Tombora y'uko amakipe agomba kujya mu matsinda, yakozwe kuri uyu wa Kane, yasize APR FC ishyizwe mu itsinda rya kabiri, isangiye n'amakipe yo muri Uganda, u Burundi na Tanzaniya.

Iyi tombora yasize APR FC igomba gucakirana na NEC FC yo muri Uganda, Bumamuru FC yo mu Burundi na Mlandege FC yo mu Kirwa cya Zanzibar.

Uretse iri tsinda APR FC iherereyemo, irya mberre rigizwe na; Singida Black Stars (Tanzania), Garde Cotes FC (Djibouti), Ethiopia Coffee (Ethiopia), Kenya Police (Kenya).

Mu gihe itsinda rya gatatu ririmo; Al Hilal (Sudan), Kator FC (South Sudan), Mogadishu City Club (Somalia), Al Ahli Madani (Sudan).

Umwaka ushize, iri rushanwa ryegukanywe n'Ikipe ya Red Arrows yo mu gihugu cya Zambiya, itsinze APR FC yo mu Rwanda, mu mukino wa nyuma wakiniwe kuri KMC Stadium.

APR FC imaze kwegukana iri rushanwa inshuro eshatu [2004, 2007 na 2010].

Mu Mwaka w'i 1996 n'uw'i 2000, yatsindiwe ku mukino wa nyuma.

Mu 1996 yatsinzwe na Simba SC yo muri Tanzaniya, mu gihe mu 2000 yatsinzwe na Tusker FC yo muri Kenya.

CECAFA Kagame Cup y'Umwaka ushize, yakinwe hagati ya tariki ya 09 n'iya 21 Nyakanga [7] 2024.

CECAFA Kagame Cup, iterwa inkunga na Perezida Kagame Paul w'u Rwanda, aho buri Mwaka atanga Ibihumbi 60 by'Amadorali ya Leta zunze Ubumwe z'Amerika.

Ikipe itwaye Igikombe ihabwa Ibihumbi 30$, iya kabiri igahabwa Ibihumbi 20$, mu gihe iya gatatu itwara Ibihumbi 10$.