APR FC yageze kuri Finale y'Igikombe cy'Intwali imaze kwihaniza AS Kigali (Amafoto)

Ikipe y'Ingabo z'u Rwanda, APR FC, yageze ku mukino wa nyuma w'Irushanwa ry'Igikombe cy'Intwali, nyuma yo kwisasira iy'Umujyi wa Kigali, AS KIgali, iyitsinze ibitego 3-0.

Umukino wahuje aya makipe yombi, wakiniwe kuri Sitade yitiriwe Pele i Nyamirambo mu Mujyi wa Kigali, ku gicamunsi cyo kuri uyu wa 28 Mutarama (1) 2026.

Intsinzi ya APR FC, ivuze ko isubiye ku mukino wa nyuma nk'uko yabikoze mu Mwaka ushize, ndetse ikanatwara Igikombe itsinze Police FC kuri penaliti 4-2.

Nyuma yo kugera ku mukino wa nyuma, APR FC itegereje iyo bizahura tariki ya 01 Gashyantare (2) 2026, hagati ya Rayon Sports na Police FC, zifitanye umukino kuri uyu wa 29 Mutarama (1) 2026, ku isaha ya saa 15:00.

Uyu mukino wa Rayon Sports na Police FC, nawo uzakinirwa kuri Sitade yitiriwe Pele i Nyamirambo, ari nayo izakira umukino wa nyuma ntagihindutse.

Tugarutse ku mukino wahuje APR FC na AS Kigali, umutoza wa APR FC,  Adel Adberrahim, yatangije mu kibuga inkorokoro ze, zirangajwe imbere na Pierre Ishimwe wari mu izamu, Claude Niyomugabo uzanzwe ari kapiteni w'iyi kipe nawe yatangiye mu kibuga, mu gihe Clement Niyigena na Gilbert Byiringiro nabo bari mu bwugarizi.

Abandi batangiye mu kibuga barimo “Bosco Ruboneka, Dauda Yussif, Ronald Ssekiganda, Hakim Kiwanuka, Gilbert Mugisha na William Togui”.

Ku ruhande rwa AS Kigali, umutoza Mbarushimana Shaban yari yabanje mu izamu Patient Ndikuriyo, mu gihe abarimo Olivier Dushimimana, Janvier Benedata, Sunday na Arsene Tuyisenge bari mu kibuga.

Umukino watangiye amakipe yombi acungana ku maso, cyane ko yari azi ko ikosa ryakorwa, buri kipe yasezererwa.

Uku gucungana, kwaviriyemo gusoza iminota 45 y'igice cya mbere, aguye miswi y'ubusa ku busa (0-0).

N'ubwo yagiye kuruhuka anganya, ku munota wa 38 w'umukino, Claude Niyomugabo wa APR FC, yakoreye ikosa rutahizamu wa AS Kigali, Arsene Tuyisenge, benshi bafashe nk'iryari kuvamo penaliti, gusa umusifuzi w'umukino avuga ko atayibonye.

Muri Sitade, abafana by'umwihariko batari ku ruhande rwa APR FC, bavugaga ko yari gutanga ikarita y'umutuku kuri Niyomugabo ndetse hakanatangwa penaliti.

Iri kosa Tuyisenge yakorewe, ryaje no kumuviramo kuva mu kibuga atarangije umukino, asohorwa ku ngobyi y'abarwayi (Blanchard).

Nyuma y'uko amakipe yombi avuye mu karuhuko k'iminota 15, abakinnyi ba APR FC bagaragaje ko yumvise neza ibyo babwiwe n'umutoza, ku munota wa 60 w'umukino, Hakim Kiwanuka, ahita anyeganyeza inshundura.

Bidatinze, nyuma y'iminota 5 gusa, William Togui yahise atsinda igitego cya kabiri, mu gihe agashinguracumu katsinzwe na Ruboneka Bosco ku munota wa 78.

Amafoto