Andreas Hountondji ari muri “bakizigenza 4 ba Benin” bashobora kudakina Umukino w'Amavubi

Umutoza w'Ikipe y'Igihugu ya Benin izwi nka Les Écureuils, Gernot Rohr yatangaje ko ashidikanya kuri ba kizigenza be 4, ndetse bashobora kudakina Umukino uzamuhuza n'Ikipe y'Igihugu y'u Rwanda kuri uyu wa 10 Ukwakira [10] 2025.

Uyu mukino w'umunsi wa 9 w'iyo gushaka Itike y'Igikombe cy'Isi kizabera muri USA-Canada-Mexique mu Mwaka utaha [2026], uteganyijwe gukinirwa kuri Sitade Amahoro i Remera mu Mujyi wa Kigali, ku isaha ya saa 18:00.

Uretse uyu mukino, Rohr avuga ko bamwe muri aba bakinnyi, bashobora no kutagaragara ku mukino w'umunsi wa 10 bazakina na Nijeriya ari nawo wa nyuma w'iyo mu matsinda.

Umukino uzahuza Benin na Nijeriya, uzakinirwa mu Mujyi wa Uyo ho muri Nigeriya, tariki ya 14 Ukwakira [10] 2025.

Bamwe mu bakinnyi bagishidikanywaho, barimo rutahizamu “Olaitan Junior” usanzwe ukinira Ikipe ya Göztepe mu gihugu cya Turukiye.

Rohr avuga ko abaganga b'Ikipe ya Göztepe, bamubwiye ko Ubuzima bw'uyu mukinnyi, butamwerera gukorera urugendo ruva i Istanbul rwerekeza i Kigali, kuko atameze neza.

Iki cyemezo ntabwo kishimiwe na Rohr ndetse n'Ishyirahamwe rya Ruhago muri Benin, cyane ko bombi bavuga ko mu minsi ishize, bari babwiwe ko uyu mukinnyi ari muryerye [Ameze neza], bityo kuba Ikipe ya Göztepe ari icyemezo kidaciye mu mucyo.

Undi mukinnyi ugishidikanywaho, ni rutahizamu “Andreas Hountondji”.

Uyu mukinnyi usanzwe ukinira Ikipe ya Burnley yo mu gihugu cy'Ubwongereza, n'umwe mu bakunze kugora Amavubi mu bihe bitandukanye, mu mikino yayahuje na Benin.

Kuri ubu, afite Imvune yagiriye mu mukino wa Shampiyona mu Cyumweru gishize, ku buryo hataremezwa niba azakina umukino wo kuri uyu wa Gatanu.

Abandi bakinnyi bagishidikanywaho barimo “Abdoul Rachid Moumini” ukinira Ikipe ya Sumgayit FKand yo mu gihugu cya Azerbaijan ndetse na “Rodolfo Aloko” ukina mu Ikipe ya NK Kustošija yo muri Croatia. 

Aba bakinnyi bose bivugwa ko bafite imvune, ariko ntawamenya, ku wa Gatanu hari abashobora gutungura.

Amafoto

Andreas Hountondji n'umwe mu bakunze kugora Amavubi mu bihe bitandukanye