Amavubi yanyagiriwe muri Afurika y'Epfo, Bafana Bafana iyakatishirizaho itike y'Igikombe cy'Isi

Ikipe y'Igihugu y'u Rwanda, Amavubi, yahuriye n'uruva gusenya muri Afurika y'Epfo, aho yari yagiye gukinira umukino wa nyuma w'iyo mu itsinda rya gatatu, mu yo gushaka itike y'Igikombe cy'Isi kizakinirwa muri USA-Canada-Mexique mu Mpeshyi y'Umwaka utaha [2026].

Uyu mukino yanyagiwemo ibitego 3-0, wayihuje n'Ikipe y'Igihugu y'Afurika, Bafana Bafana, ukinira kuri Mbombela Stadium.

Ibi bitego byatsinzwe na; Evidence Makgopa ku munota wa 5, Oswin Appollis asubyamo ku wa 26, mu gihe Evidence Makgopa yatsinze agashinguracumu ku munota wa 72.

Muri uyu mukino, Amavubi yagowe by'umwihariko n'abakinnyi barimo; Makgopa na Appollis, kuko uretse kuyatsinda ibitego, banatanze imipira yabivuyemo.

Bamwe mu bakunzi b'Amavubi bawukurikiye, bavuze ko ari ku nshuro ya mbere mu mikino yo gushaka iyi tike, babonye Ikipe y'igihugu y'u Rwanda ikina nabi, ndetse ikanarushwa bigaragarira buri umwe.

Amavubi yari yabanje mu kibuga: Ntwari Fiacre, Manzi Thierry, Mutsinzi Ange, Byiringiro Jean Gilbert, Niyomugabo Claude, Mugisha Gilbert, Mugisha Bonheur, Bizimana Djihad, Muhire Kevin, Kwizera Jojea na NsHuti Innocent.

Mu gihe; Buhake, Ishimwe, Kavita, Imanishimwe, Darryl, Emmanuel, Yunusu, Ruboneka, Enzo, Anicet, Abeddy na Gitego bari ku ntebe y'abasimbura.

Muri iri tsinda rya gatatu, Ikipe y'Igihugu ya Nijeriya, yanyagiye iya Benin ibitego 4-0, byatsinzwe na Victor Osimhen ku munota wa [3, 37 na 51], mu gihe ikindi cyatsinzwe na Frank Onyeka ku munota wa 90+1.

Nyuma y'uko Afurika y'Epfo iyoboye iri tsinda, yakurikiwe n'iya Nijeriya n'amanota 17, ishobora kugira amahirwe yo gukina amajonjora azahuza amakipe yabaye aya kabiri meza.

Umwanya wa gatatu wasorejeho Ikipe y'Igihugu ya Benin n'amanota 17, Lesotho isoreza ku mwanya wa kane n'amanota 12, u Rwanda rusoreza ku mwanya wa gatanu n'amanota 11, mu gihe Zimbabwe yasoje ari iya nyuma n'amanota 5.

Ikipe y'Igihugu y'Afurika yongeye kubona itike nyuma yo gukina imikino y'igikombe cy'Isi nyuma y'Imyaka 15, kuko yagiherukagamo mu 2010 ubwo yari yacyakiriye.

Uretse kuyikina yayakiriye, indi nshuro yaherukaga kubona iyi tike, yari mu 2002, mu mikino yakiniwe mu Buyapani na Koreya y'Epfo.

Mu gihe Afurika y'Epfo yabonaga itike, abakunzi ba ruhago mu Rwanda, bakomeje kwibaza iherezo ry'Amavubi, cyane ko bavuga ko umusaruro wayo nkene, ukomeje kuba agatereranzamba.

Hari n'abagiye kure, bavuga ko yaba ihagaritswe mu gihe runaka, ikabanza gutegurwa neza, kuko n'ubwo igikomeye ikora ari ukwitabira gusa.

Bavuga ibi nyamara, mu gihe aya majonjora agitangira, Amavubi yari yatsindiye Bafana Bafana i Huye, ibitego 2-0, ubwo yatozwaga na Torsten Frank Spittler, waje gusimburwa na Adel Amrouche.

Muri uru rugendo rwo gushaka iyi tike, mu mikino 10 u Rwanda rwakinnye, twatsinzemo 3, runganyamo 2, mu gihe rwatsinzwemo 5.

Muri iyi mikino kandi, rwinjije ibitego 5, rutsindwa ibitego 9. Bivuze ko rusoje uru rugendo rufite umwanda w'ibitego 4.

Amafoto