AMAFOTO: Rayon Sports yageze ku mukino wa nyuma w’Igikombe cy’Amahoro isezereye Gorilla FC

Ikipe ya Rayon Sports yakatishije itike y’umukino wa nyuma w’Igikombe cy’Amahoro cya 2025-26 isezereye Gorilla FC ku gitego cyo hanze, nyuma yo kunganya ubusa ku busa (0-0) mu mukino wo kwishyura wa ½ wakiniwe kuri Kigali Pelé Stadium ku mugoroba wo kuri uyu wa Kabiri tariki ya 12 Gicurasi (5) 2026.

Mberey yo kwisobanura mu mukino wo kwishyura, amakipe yombi yari yanganyije igitego 1-1 mu mukino ubanza.

Ni ku nshuro ya kabiri yikurikiranya iyi kipe bahimba Gikundiro igera ku mukino wa nyuma w’iri rushanwa, nyuma y’uko mu mwaka ushize w’i 2025 yari yageze kuri finale ariko itsindwa na APR FC ibitego 2-0.

Uyu mukino wo kwishyura waranzwe n’ihangana rikomeye hagati y’impande zombi kuva utangiye kugeza ku munota wa 90, Umusifuzi Twagirumukiza Abdulkarim awushyizeho akadomo.

Rayon Sports yatangiye isatira, ndetse ku munota wa 18, Ndikumana Asman abona uburyo bwo kunyeganyeza amazamu ku mupira yahawe na Moussa Omar, arekuye ishoti hirya gato y’izamu rya Gorilla FC ryari ririnzwe na Ntagisanayo Serge.

Nyuma y’ubu buryo bwari bumaze guhushwa na Rayon Sports, Gorilla FC yokeje igitutu ubwugarizi bwa Rayon Sports bwari burinzwe na Youssou Diagne na Emery Bayisenge binyuze mu bakinnyi barimo Mosengo Tansele na Khalifa Traore, biranga biba iby’ubusa.

Amakipe yombi yasoje iminota 45 y’igice cya mbere anganya ubusa ku busa (0-0).

Igice cya kabiri cy’uyu mukino cyatangiye Rayon Sports ishaka igitego cyo kwizeza abafana kubona itike y’umukino wa nyuma, ari nako kandi Gorilla FC iyicungira hafi.

Nyuma yo kotsa igitutu Gorilla FC, Tambwe Gloire na Nshimiyimana Emmanuel Kabange babonye bwo kunyeganyeza inshundura, ntibabubyaza umusaruro.

Gorilla FC ntabwo yatereye agati mu ryinyo, kuko Moussa Omar, yari anyeganyeje inshundura, ariko umupira unyura ku rushundura ruto rw’izamu, abafana ba Rayon Sports imitima yenda kubavamo.

Mu minota ya nyuma, umukino warushijeho gukomera, ndetse habaho no gushyamirana hagati y’abakinnyi b’impande zombi barimo ‘Masudi Narcisse na Faustin Likau’.

Muri uyu mukino, Umutoza wa Rayon Sports, Haringingo Francis Christian, yari yahisemo gutangiza mu kibuga Kwizera Olivier Youssou Diagne (C) Emery Bayisenge Ganijuru Elie Nshimiyimana Emmanuel Kabange Ndayishimiye Richard Tambwe Gloire Ngongo Bigirimana Abedi Ndikumana Asman Mugisha Didier Tony Kitoga

Mu gihe uwa Gorilla FC, Kirasa Alain, yari yakoresheje Ntagisanayo Serge Akayezu Jean Bosco Kevin Uwimana Moussa Omar Duru Ikena Mercy Masudi Narcisse Kanamugire Roger Nduwimana Franck Mosengo Tansele Rutonesha Hesbon Khalifa Traore.

Biteganyijwe ko umukino wa nyuma w’Igikombe cy’Amahoro uzakinwa tariki ya 23 Gicurasi (5) 2026, ukazahuza Rayon Sports n’Ikipe izarokoka hagati ya APR FC na Etincelles FC, zifitanye umukino wo kwishyura kuri uyu wa 13 Gicurasi (5) 2026.

Rayon Sports imaze kwegukana iri rushanwa inshuro 10 (1976, 1979, 1982, 1989, 1993, 1995, 1998, 2005, 2016 na 2023).

Amafoto