AMAFOTO: APR FC yihereranye Rayon Sports mu mukino w'umunsi wa karindwi wa Shampiyona

Ikipe y'Ingabo z'u Rwanda, APR FC, yihereranye Rayon Sports iyinyabika ibitego 3-0 mu mukino w'umunsi wa karindwi wa Shampiyona y'ikiciro cya mbere.

Uyu mukino wakiniwe kuri Sitade Amahoro i Remera mu Mujyi wa Kigali, ki gicamunsi cyo kuri uyu wa 08 Ugushyingo (11) 2025.

Bitandukanye n'imikino yabakabaga ine aya makipe yombi yatandukanaga aguye miswi, kuri iyi nshuro APR FC yaje imeze nk'Intare yakomeretse.

Mbere y'uko aya makipe ahura, APR FC yari yaguye miswi y'u 0-0 na Rutsiro FC, mu gihe Rayon Sports yari yatsinze Marine FC igitego 1-0, mu mikino yombi yakiniwe mu Karere ka Rubavu, kuri Sitade Umuganda.

Amakipe yombi yanjiye muri uyu mukino, Rayon Sports iri ku mwanya wa kabiri ku rutonde rw'agateganyo n'amanota 13 mu mikino 6, mu APR FC yari ku mwanya 8 n'amanota 8 mu mikino 4.

Bidatinze, APR FC yerekanye ko yari inyotewe n'intsinzi yari imaze imikino 2 ishakisha, nyuma yo kunganya na Kiyovu Sports na Rutsiro FC.

Ku munota wa 26 w'umukino, Umugande, Ronald Ssekiganda yahise anyeganyeza inshundura kuri Koruneri yatewe na Ruboneka, mu gihe Umunya-Ivory, Coast William Togui yasonzemo ku munota wa 37.

Ibitego bya Ssekiganda na Togui, byajyanye impande zombi mu karuhuko k'iminota 15, APR FC iyoboye umukino n'intsinzi y'ibitego 2-0.

Igice cya kabiri cyatangiye Rayon Sports ikomeza kwihagararaho, ariko akagozi kaza gucika ku munota wa 93, ubwo Umunya-Maurtania, Mmamadou Sy yatsindaga agashinguracumu.

Intsinzi y'uyu mukino, yafashije APR FC kwegera imbere ku rutonde rwa Shampiyona, ifata umwanya wa 5 n'amanota 11, mu gihe igifite imikino 2 y'ibirarane.

Imikino 2 y'ibirarane, izayihuza n'amakipe yo mu Karere ka Rubavu, Marine FC na Etincelles FC.

Muri uyu mukino, Ruboneka Jean Bosco w'Ikipe ya APR FC, yawuhembwemo nk'uwahize abandi, ahabwa Amafaranga y'u Rwanda Ibihumbi 100.

Mu yindi mikino yakinwe kuri uyu wa Gatandatu, Rutsiro yaguye miswi y'u 0-0 na Etincelles FC, Gorilla FC itsindwa 1-0 n'Amagaju, Marine FC itsinda AS Muhanga ibitego 2-0, Mukura VS&L itsindwa 2-0 na Gasogi United, mu gihe Musanze FC yatsinze Gicumbi ibitego 3-2.

Abakinnyi impande zombi zabanje mu Kibuga:

APR FC

Pierre Ishimwe

Gilbert Byiringiro

Clement Niyigena

Yunussu Nshimiyimana

Claude Niyomugabo

Ronald Ssekiganda

Dauda Yussif Seidu

Hakim Kiwanuka

Bosco Ruboneka

Gilbert Mugisha

William Togui.

Rayon Sports

Pavelh Ndzila

Ali Serumogo

Emmanuel Nshimiyimana

Youssou Diagne

Prince Musore

Olivier Niyonzima

Abedi Bigirimana

Richard Ndayishimiye

Gloire Tambwe

Aziz Bassane

Yves Habimana

Amafoto